A Deputación activa actuacións na provincial por un total de 1,7 millóns de euros
Por Oskar Viéitez
A Deputación de Pontevedra xestionou este venres en Xunta de Goberno actuacións por un total de 1,7 millóns de euros
Segundo informou en rolda de prensa o presidente provincial, Luis López, este venres na Xunta de Goberno aprobáronse as bases da nova edición dos campamentos na Lanzada que ofertarán para o próximo verán un total de 1.540 prazas destinadas a nenos da provincia de Pontevedra nacidos entre 2011 e 2016.
Esta actividade está orzada en 380.000 euros. Adxudicaranse 1.330 prazas polo procedemento xeral e 210 prazas polo procedemento específico: reservaranse para menores en situación ou risco de exclusión social. O programa desenvolverase en 11 quendas de sete días de duración cada un.
Luis López tamén informou dun investimento de 374.000 euros no Centro Príncipe Felipe que se destinarán á substitución das escaleiras de emerxencia. O prazo de execución destes traballos é de cinco meses e inclúen a nova envolvente exterior do edificio, o saneamento de vigas e piares da estrutura principal e a instalación de iluminación e portas de emerxencia.
FONDOS EUROPEOS
O presidente da Deputación tamén deu conta nesta comparecencia da aprobación do proxecto biocostero de conservación da biodiversidade en hábitats galaico portugueses para promover un desenvolvemento equilibrado das economías locais, con cargo ao programa Interreg de cooperación transfronteiriza España-Portugal (POCTEP 2021-2027).
O orzamento é de máis de 350.000 euros dos que este programa europeo financia o 75%. A Deputación de Pontevedra é a principal beneficiaria desta iniciativa na que tamén colaboran a organización SEO-Birdlife e a Cámara municipal de Viana do Castelo.
Luis López tamén informou doutra achega europea de 290.000 euros do Instituto Enerxético de Galicia (INEGA) que, a través do Programa estatal de incentivos ligados á mobilidade eléctrica "MOVES III", financiado con fondos Next GenerationEU, permitirá instalar puntos de recarga para vehículos eléctricos en varios edificios da institución provincial como son o Centro Príncipe Felipe, a Estación Fitopatológica de Ou Areeiro, os viveiros de empresa de Barro e de Lalín, o Parque de Maquinaria ou a Leira de Mouriscade.
FENDA DIXITAL
Por último, a Deputación de Pontevedra pon en marcha o programa “Hub para a loita contra a fenda dixital e a soidade non desexada no medio rural da provincia de Pontevedra”.
O orzamento total é de medio millón de euros aos que o Ministerio para a Transición Ecolóxica e o Reto Demográfico achega unha axuda de 280.000 euros.
Este proxecto piloto, como explicou o presidente Luis López, poñerase en marcha nos concellos da Illa de Arousa, As Neves, Cuntis, Moraña e Forcarei, formará a un total de 500 persoas e está orientado especialmente a persoas maiores que son quen está tendo moitas dificultades hoxe en día na comunicación con administracións, empresas e servizos que hai que xestionar en moitas ocasións de forma telemática.
Relacionadas:
-
Cuntis, A Illa de Arousa e Moraña coñecen o proxecto da Deputación para loitar contra a fenda dixital
Por Redacción |
-
Luis López destaca a "actividade intensa" nos primeiros cen días de goberno na Deputación "lonxe do sectarismo"
Por Oskar Viéitez & Mónica Patxot |
-
Tres días de loito oficial na provincia polo incendio de Vigo no que perderon a vida catro persoas, tres delas menores de idade
Por Diego Espiño |
-
Luis López convoca a todos os alcaldes para explicar o novo plan de investimentos da Deputación
Por Oskar Viéitez |