Volve Noctámbulas, o programa de lecer e tempo libre para a mocidade de Soutomaior
Por Redacción
Unha nova edición de Noctámbulas comeza este sábado no concello de Soutomaior.
Trátase dun programa dirixido á mocidade de entre 12 a 30 anos que se desenvolverá, dende esta fin de semana, todos os sábados de outubro e novembro.
Como novidade, nesta edición, as actividades levaranse a cabo no IES Soutomaior.
Actividades que serán todas de balde, o único requisito para participar nas mesmas é contar co carné de Noctámbulas que se pode solicitar en liña ou tamén se pode facer de maneira directa no momento do inicio da actividade.
O obxectivo deste programa é o de encher de contidos saudables o tempo libre e de lecer dos sábados dos mozos que o desexen. Con este fin, e co lanzamento da campaña INFOEXPRESS, a finais da pasada semana, un evento que tivo lugar nos institutos do concello, tamén se repartiu o programa e actividades de Noctámbulas nos centros educativos para informar de maneira directa das actividades que se desenvolven no concello.
Clubs de lectura, maratón de series, obradoiros de malabares, percusión corporal, roteiros de fotografías, ioga, defensa persoal... estas serán soamente algunhas das ofertas que se presentan no calendario desta nova edición de Noctámbulas.
Cada sábado terá a súa axenda de actividades que se desenvolverán os días 14 e 21 de outubro e o 4, 11, 18 e 25 de novembro no IES Soutomaior en horario de 20:00 para a 23:00.