Un milleiro de motoristas xúntanse en Caldas no encontro moteiro dos Keimaos
Por Redacción
A sexta Xuntanza Moteira da Peña Os Keimaos, de Moraña, desenvolvíase esta fin de semana en Caldas de Reis coa presenza de máis dun milleiro de motos e numeroso público afeccionado ao motor.
Manuel Fariña, tenente de alcalde, destacaba o éxito de participación ao superar as expectativas e con visita ao área recreativa de Paradivas e ao centro da vila de persoas procedentes de toda Galicia, doutras provincias estatais e tamén de Portugal.
Trátase da primeira vez que Caldas acolle o evento e o representante do goberno local considera que se trata dunha forma de promoción turística para os negocios locais. Engade que desde as áreas de Cultura, Turismo e Deportes trabállase nunha próxima edición
Segundo Fariña, "a avalancha de xente chegou ao volver da ruta" e durante a xornada se degustou o "porquiño á brasa" e "carneiro ao espeto" entre as persoas participantes.
Protección Civil e a Policía Local supervisaron todas as actividades sen que se rexistrasen incidentes.