Detida unha muller de 40 anos que tivo un altercado nun bar e logo desobedeceu e atacou á Policía Local
Por Natalia Puga
A Policía Local de Pontevedra detivo o martes unha veciña da cidade de 40 anos como presunta autora dos delitos de atentado e resistencia á autoridade tras protagonizar un altercado nun bar do centro histórico e atacar e insultar os axentes que acudiron para identificala.
Os feitos ocorreron sobre as 15.00 horas deste martes 3 de outubro. Unha traballadora dun local do centro histórico chamou á Policía Local porque acababa de ter un problema cunha clienta, que nese momento estaba tirada na rúa.
Á chegada dos axentes, a muller estaba tirada na vía pública e, aparentemente, non respondía a estímulos. Os axentes achegáronse e preguntáronlle como estaba, pero ela non lles respondeu. Segundo fontes da Policía Local, a muller estaba consciente e mirábaos, pero non lles respondía.
Os policías chamaron unha ambulancia e, nese momento, a muller levantouse con intención de irse. De forma sorpresiva, abalanzouse sobre os policías e a un propinoulle un bofetón que logrou esquivar.
A muller seguiu atacando aos policías, aos que rabuñou no pescozo e gritou: "hijo de puta, te voy a matar", ata que finalmente, entre varios, lograron reducila e detela por resistencia e atentado.
Tanto a muller detida como un dos policías foron trasladados ao Hospital Montecelo con lesións e logo ela derivada á Comisaría da Policía Nacional. Alí, quedou en liberdade á espera de ser requirida polo xulgado.
Os policías que actuaron nesta intervención tamén coñeceron, a través dunha traballadora, o ocorrido previamente no interior do restaurante. Segundo relagou, a muller entrou no local pedindo un viño a pesar de que xa se notaba que estaba baixo os efectos do alcol ou doutras substancias.
Cando a empregada serviulle o viño e un petisco, queixouse porque non lle parecía que a cantidade fose suficiente e empezou a dirixirlle improperios e insultos como "hija de puta" .
A continuación, dirixiuse ao servizo coa copa de viño e o petisco na man e, cando lle chamaron a atención, empezou a esparexer o contido polo establecemento.
Dado que non cesaba na súa actitude, a responsable do negocio pediulle que se fose, incluso perdoándolle a consumición, que non tiña que pagala. Con todo, a clienta dixo que non se iría e tiraríase na rúa. E así fixo. Unha vez na rúa, tirouse por unhas escaleiras próximas na rúa Manuel Quiroga. E foi nese momento cando alertaron á Policía Local.