As depuradoras seguen ás igrexas coma obxectivo dos cacos en Ponte Caldelas
Por Redacción
Operarios do Concello de Ponte Caldelas detectaron a sustración das tapas de inox existentes nas depuradoras de Gradín, Paradela e Xustáns que, aínda que non supoñen risco para o seu funcionamento si representan un importante prexuízo económico e de seguridade nas instalacións.
O Concello ordenou á Policía Local que levantara acta do roubo e que inspeccionara o resto das depuradoras existentes no municipio para determinar o alcance real das subtraccións, detectándose que a retirada das tapas de inox se centrou nas minidepuradoras de Gradín, Paradela e Xustáns.
Este roubo ademais de supoñer un prexuízo económico para o Concello, que terá que repoñelas o máis urxentemente posible, aínda que xa non serán de inox para evitar que os ladróns volvan roubar estas instalacións e que as arquetas queden abertas ao aire libre co problema de seguridade que pode ocasionar isto.
O alcalde, Perfecto Rodríguez, lamentou este episodio, polo que representa de gasto extra para o erario público, que coincide no tempo coa ondada de roubos que está a padecer o municipio en instalacións eclesiásticas como as igrexas de Forzáns, Tourón e Anceu.
Tanto os axentes da Policía Local de ponte Caldelas coma os responsables do posto da Garda Civil iniciaron pescudas para determinar a autoría dos roubos.