Preto de 250 persoas participarán na festa do WordPress
Por Oskar Viéitez
A creación de contidos será neste 2023 o eixe da WordCamp Pontevedra, un evento centrado nas múltiples aplicacións do xestor de contidos de código aberto máis empregado no mundo para a creación de espazos web, WordPress.
Se desenvolverá na Facultade de Comunicación entre este venres 15 e o domingo 17.
Promovido pola comunidade WordPress de Pontevedra, coa colaboración da Universidade de Vigo e da Fundación WordPress, trátase do único evento destas características que se desenvolve en Galicia e que conta, a día de hoxe, con preto de 230 persoas inscritas.
A vicerreitora do campus, Eva María Lantarón, a decana da Facultade de Comunicación, Emma Torres, e o representante do comité organizador Wajari Velásquez presentaron este mércores na Casa das Campás a sexta edición deste evento, que tamén é "a festa das comunidades WordPress de toda Galicia", como sinalou Velásquez.
A WordCamp contará este venres 15 cunha xornada previa, con inscrición gratuíta, na que as persoas interesadas poderán iniciarse "desde cero" no manexo deste xestor de contidos, nun taller impartido por un dos maiores blogueiros de WordPress en lingua hispana, Fernando Tellado.
Xa pola tarde, tanto os participantes neste taller como calquera outra persoa interesada poderán tomar parte nun hackatón no que poñer en práctica os coñecementos adquiridos traballando na elaboración dos espazos web de tres asociacións sen ánimo de lucro.
Para a xornada de sábado, programáronse un total de 28 conferencias e coloquios, que terán lugar de xeito simultáneo en dous espazos da facultade. A creación de contidos, posicionamento web ou aplicacións da intelixencia artificial integran o programa dun evento que mantén aberta a súa inscrición, cun prezo reducido para os integrantes da comunidade universitaria.
Finalmente, o domingo terá lugar o chamado Día do Contribuídor, no que os participantes traballarán na creación e mellora de ferramentas e aplicacións para este xestor de código aberto, cuxo crecemento está ligado en boa medida ao traballo voluntario das comunidades articuladas en torno a WordPress.