"Ante os oídos xordos da Xunta" o Concello de Caldas acomete melloras no CEIP de San Clemente
Por Oskar Viéitez
"Os oídos xordos e a inacción da Consellería de Educación obrigan ao Concello de Caldas a investir preto de 6.000 euros na sustitución do solo de tres aulas do CEIP de San Clemente", asegura o goberno local nun comunicado.
Segundo sinala, estas aulas "non reunían as condicións necesarias para a función docente que nelas se viña realizando" e reitera a necesidade de acometer a reforma integral da primeira planta deste colexio, "onde a carpintería exterior de aluminio e o falso teito hai anos que esgotaron a súa vida útil".
O Concello de Caldas sinala que esta obra, "que lle correspondería acometer en exclusiva á Xunta" foi demandada pola dirección do centro.
Esta actuación súmase aos máis de 20.000 euros que o Concello de Caldas está a investir en actuacións de mantemento dos centros educativos, nunha campaña que está xa moi avanzada e que pretende ter os centros educativos a punto para o comezo do curso escolar.
O tenente de alcalde caldense Manuel Fariña manifestou que "estamos convencidos de que os nenos e nenas de Caldas merecen un trato moitísimo mellor por parte da Xunta".
Dende o Concello de Caldas lamentaron o "abandono dos centros educativos caldenses por parte da Xunta" e acusaron a administración autonómica de manter ao alumnado "nunhas condicións francamente mellorables".