O Concello de Marín recalca a transparencia da Festa Corsaria fronte ás irregularidades denunciadas polo BNG
Por Oskar Viéitez
Creada e actualizada
Creada e actualizada
O BNG de Marín asegura ter constancia de "graves irregularidades" cometidas na contratación de traballadores durante a celebración da Festa Corsaria celebrada esta pasada fin de semana.
O Concello de Marín saíu ao paso destas acusacións e sinala que a organización da Festa Corsaria é "un traballo incansable que se leva adiante desde o Concello coa máxima transparencia, a través da contratación de empresas privadas que surten á festa de todas as necesidades de loxística, organización e posta en marcha das actividades".
A portavoz municipal do BNG de Marín, Lucía Santos Omil, afirma que durante os tres días de celebración da Festa Corsaria "un grupo de persoas estivo traballando en situación irregular, sen ningún tipo de contrato nin cobertura pola Seguridade Social".
Lucía Santos explica que estas persoas realizaron diversas actividades como a colocación de material do evento, a participación en desfiles ou a atención das atraccións, "e percibiron o seu salario en efectivo e sen ningún tipo de contrato, xustificante de pago ou nómina".
A voceira nacionalista indicou que "segundo temos coñecemento, persoas que forman parte da organización xuvenil Novas Xeracións do Partido Popular foron as encargadas de buscar aos traballadores para poñelos a disposición dunha empresa subcontratada polo Concello", que foi a encargada da organización e supervisión da Festa Corsaria, polo que conclúe Lucía Santos que "o Partido Popular ten unha responsabilidade directa sobre estes feitos reprobables".
A portavoz do BNG pregunta "en caso de percance ocasionado ou sufrido por un destes traballadores eventuais, en que situación se atoparía o Concello? E o traballador implicado?".
É por isto que a voceira do BNG solicita urxentemente explicacións á alcaldesa de Marín, María Ramallo, e á concelleira de Festas, Marián Sanmartín, por este "mal proceder na xestión e organización da Festa Corsaria", e que aclaren "quen se encargou da suposta contratación de persoal, por que non se contratou mediante contrato ás persoas traballadoras e de onde saen os cartos cos que se pagou en efectivo ás mesmas".
Lucía Santos califica estes feitos como "moi graves, xa que unha administración como o Concello de Marín debe ser dilixente e exemplo de boas prácticas, ademais de levar a cabo con total e absoluta transparencia o proceso de contratación pública".
RESPOSTA DO CONCELLO
O Goberno Local salienta que a "grandeza" da Festa Corsaria pasa tamén por ser "un evento con colaboración de múltiples asociación da vila e da contorna, que poden así promocionar a súa actividade e recibir na maior parte dos casos unha remuneración pola súa colaboración".
"Desde o Concello, recalcamos tamén que non se contratan directamente a traballadores, senón a varias empresas que se encargan da organización da festa e sobre os que recae a contratación", aseguran.
"Esperamos que en caso de que algún grupo detectase irregularidades, cursen a conveniente denuncia, xa que senón están realizando acusacións graves sen unha base sólida", engade o Goberno local en resposta ao Bloque.
En virtude da transparencia, o Concello emitiu un comunicado de prensa no que recolle os nomes das asociacións que participaron da Corsaria: Asociación Cultural Deportiva Batalla de Rande (Colocaron un posto no Parque Eguren no que promocionaron a súa festa, ademais de prestar traxes e armas, tamén participaron no Desfile Inglés e fixeron pasarrúas durante todo o evento), a Asociación Cultural, Xuvenil E Deportiva Combrus e a Asociación Cultural Vamos A Todo (Colaboraron a través do préstamo/alquiler de distintos elementos de atrezo e ambientación, como o Barco Inglés, o Barco Corsario, canóns, carros e outros obxectos, ademais de aportar persoal voluntario para a custodia e coidado do barco durante o desfile. Retribuíuse con 2.700 euros á primeira e 2.299 euros á segunda).
Continúa esta relación con: Asociación Trompos Os Pés (Pola actuación da Batucada Maracumbé Bloco, retribuida con 1.000 euros, ao longo do día), Asociación Músico Cultural Charanga Noroeste (Pola súa actuación da Charanga Noroeste, retribuida con 950 euros, por todo o día), Asociación Cultural Axé Bahía Batucada (Pola súa actuación, retribuida con 1.300 euros, por todo o día), Asociación Amigos dos rapaces (Colaboraron coa dinamización e decoración da zona do Lameira, retribuida con 600 euros).
A estas, súmanse outras moitas asociacións activas de Marín que participaron con postos, demostracións e decoración no evento na Alameda, Parque Eguren ou Praza 8 de Marzo.
Desde a empresa encargada da xestión e loxística do evento, ademais, adxuntouse a documentación referida ás persoas que traballaron no evento e que estiveron debidamente aseguradas, "que foron as que realmente desempeñaron traballos imprescindibles para a celebración da festa".