Acusan ao Concello de "abandono de funcións" no rescate dun gato que estivo máis dun día nunha árbore
![Natalia](/web/cache/scene/uploads/xornalistas/foto/9b5/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/577f8fbb69-hkm23_ri.jpg)
Por Natalia Puga
![](/web/cache/scene/uploads/fotos/foto/ea9/_S7QytKoutjK3UsovKMnMzytWsi62MjK0UipKLc6sStUxMjDQSU_/_7NK0kt0inJL1CyrgUA_/64e389b9b0-3.jpg)
© PontevedraViva
![](/web/cache/scene/uploads/fotos/foto/39b/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/64e389c77f-222.jpg)
© PontevedraViva
Máis de 24 horas estivo un grupo de pontevedreses tentando rescatar un gato que se subiu a unha árbore no vial situado entre a avenida Josefina Arruti e a estación de autobuses e que, a pesar dos seus reiterados intentos, non baixaba á rúa.
Finalmente, o felino logrou ser rescatado sobre as doce do mediodía deste luns, pero este grupo de persoas levaba tentándoo desde primeira hora da mañá do domingo.
Co gato xa a salvo, decidiron denunciar a situación de perigo que se xerou. Así, quéixanse de que tanto o domingo como este luns chamaron varias veces á Policía Local e aos bombeiros para pedir a súa colaboración no rescate. Segundo a súa versión dos feitos, os policías dixéronlles que se correspondía cunha tarefa dos bombeiros e eles que carecían de medios suficientes.
Alberto de Salazar, coordinador local de PACMA e avogado de profesión, denunciou o sucedido no Concello de Pontevedra.
Lembra que a Lei de Protección e Benestar de Animais de Compañía en Galicia atribúe ao Concello a competencia e obrigación de recoller aos animais perdidos ou abandonados, de modo que esta forma de actuar supón un "abandono de funcións" e tamén "incumprimento" da norma autonómica.
Ao gato descubrírono sobre esa árbore de gran altura á primeira hora da mañá do domingo un grupo de voluntarios que colaboraba coas tarefas de limpeza do río Gafos organizadas pola asociación ecoloxista Vaipolorío.
Durante todo o día do domingo, estiveron pendentes do animal e pola noite uníronse un grupo de mozos residentes da zona que viron o ocorrido desde a súa casa.
Xa na mañá deste luns, lograron unha escaleira e usárona para subir á cima da árbore. Tras rubir polas ramas, lograron rescatar o gato.
Ademais de denunciar a situación de abandono na que se atopou o animal, tamén critican que os cidadáns que participaron no rescate puxéronse en perigo sen contar cos medios nin a preparación específica para este tipo de situacións. "Podía pasar calquera cousa e quen sería o responsable?", pregúntanse, ante o risco asumido.