Poio comprométese a axilizar as solicitudes de vaos pendentes de tramitación
Por Redacción
O Concello de Poio asegura traballar para desbloquear máis de 40 expedientes de solicitudes de vaos permanentes en garaxes e accesos que acumulan meses de atrasos sen tramitarse.
Así o explica o alcalde, Ángel Moldes, afirmando que busca solucións para desatascar este tipo de xestións e axilizar a tramitación.
Neste caso, sinala, algúns expedientes estaban xa iniciados ou ata contaban co informe favorable da Policía Local, requisito imprescindible, pero "incomprensiblemente" quedaron bloqueados na tramitación final. Tamén sucedeu con solicitudes de pintado que están sen executar.
A idea é "dar unha resposta rápida a todas estas persoas e por iso xa demos os primeiros pasos para solucionalo con moita brevidade. O obxectivo é aumentar a rapidez coa que se realizan os trámites para solucionar uns expedientes que non requiren grandes recursos", sinala Moldes.
"Queremos evitar que se acumulen trámites e solicitudes que só provocan esperas e frustacións para quen os solicita. O noso compromiso é dar unha solución rápida e desbloquear todas estas solicitudes", defende o rexedor afirmando que varios dos veciños afectados solicitaron información ao Concello nas últimas semanas.