Un informe técnico tomba a moción do PSOE sobre a feira ambulante
Por Oskar Viéitez
Novo xiro na polémica aberta coa localización definitiva da feira ambulante de Pontevedra.
A concelleira de Promoción Económica, Anabel Gulías, deu conta este mércores en rolda de prensa do informe elaborado de oficio pola Secretaría do Pleno no que tomba a moción que o grupo municipal do PSOE en Pontevedra levará ao próximo pleno para solicitar o traslado definitivo do mercadillo ambulante á Alameda.
Lembremos que a moción presentada pola concelleira Yoya Blanco, responsable de mercados no anterior mandato, solicita a modificación do artigo 5 da ordenanza de venda ambulante vixente, que data do ano 1997, para establecer a Alameda como lugar principal para a organización deste mercadillo, así como establecer Campolongo como lugar alternativo cando a Alameda estea ocupada con outras actividades. Así mesmo, piden tamén incluír estes emprazamentos no texto da nova ordenanza, que se atopa en trámite de aprobación.
O informe da Secretaría do Pleno establece a "inviabilidade" da proposta presentada polo PSOE. Concretamente, nas súas conclusións o informe di que "a proposición presentada contempla unha alegación á ordenanza en tramitación presentada despois do prazo de exposición pública. Procedería, por tanto, a súa inadmisión por extemporánea".
Tal e como resumiu Anabel Gulías, a Secretaría do Pleno entende que "non se pode presentar alegacións unha vez que finalizou o prazo de exposición pública porque se converte nunha volta para empezar" ou o que é o mesmo "volver á casiña de inicio".
Ademais o informe tamén sinala que a proposta "carece dos informes preceptivos" por parte da asesoría xurídica do Concello e engade que, "de ser aceptada, esixiría unha nova fase de exposición pública e audiencia".
"Non vale facelo desta forma", resumiu a concelleira nacionalista, "non é posible facer unha modificación da ordenanza cando xa pasaron todos os trámites pertinentes".
"Estamos a falar dunha cuestión seria", recalcou Anabel Gulías, "que tal e como está agora mesmo a ordenanza supón que no mellor dos casos estariamos a falar dunha solución para o ano que vén".
"INSTRUMENTALIZADOS"
Anabel Gulías asegurou que no Goberno Local de Pontevedra "lamentamos profundamente" a situación xerada e advertiu aos vendedores ambulantes que "creo que neste momento están a ser instrumentalizados, utilizados politicamente".
A concelleira de Promoción Económica apuntou que "se se lles está dicindo que isto vai ser cuestión de días, que no próximo pleno vai arranxar, teñen que saber que é falso, que non é certo e que xa non é unha cuestión de opinión senón técnica".
AVENIDA DE BOS AIRES
A concelleira de Promoción Económica lembrou que "segue en pé" a proposta de situar a feira na avenida de Buenos Aires como emprazamento alternativo que "estamos dispostos a facilitar para canto antes sexa posible", dixo.
"Eu son concelleira de Pontevedra non son concelleira da feira" subliñou Anabel Gulías antes de lembrar que a proposta do Concello despois de consultar a todos os sectores afectados "é buscar unha localización que xere sinerxias" e neste sentido mostrouse convencida de que "hai un consenso amplo" da necesidade de dinamizar o Mercado de Abastos por iso exponse a localización na Avenida de Buenos Aires "a mellor proposta para a cidade".
Relacionadas:
-
Os ambulantes irromperán na Feira Franca e o Mundial de Tríatlon se Lores non cumpre a súa promesa de hai 35 anos
Por Natalia Puga & Mónica Patxot |
-
Iván Puentes insiste en que "non hai razón obxectiva ningunha" para non trasladar a feira á Alameda e ve "certa desinformación"
Por Natalia Puga |
-
Sociedade Xitana Española quere recuperar os postos da feira de Pontevedra
Por Oskar Viéitez |
-
O Goberno local denuncia unha "utilización perversa dos vendedores ambulantes"
Por Natalia Puga |
-
O PSOE mantén o pulso para ubicar a feira na Alameda a pesar das "triquiñuelas administrativas"
Por Oskar Viéitez | Creada e actualizada
-
Os ambulantes suman máis de 3.500 sinaturas de apoio a súa permanencia na Alameda
Por María José Pita & Anxo Lourido |
-
O PSOE levará ao pleno o traslado dos ambulantes á Alameda coa esperanza de chegar a un acordo unánime
Por Manu Otero |
-
Lanzan o "Plan Mercado", que busca converter a contorna da praza na "zona cero" do comercio local
Por Natalia Puga & Mónica Patxot |
-
Nova "pinza": ao PSOE parécelle "fantástico" o pacto que ofrece o PP para fixar a Alameda como localización definitiva para a feira
Por Oskar Viéitez |