Cuntis convoca axudas para mercar material escolar
Por Redacción
O Concello de Cuntis abre unha liña de axudas ao estudio para familias con dificultades socioeconómicas dotada con 120 euros por alumno.
Estas axudas van orientadas a apoiar ás familias con fillos matriculados no centro escolar público de Cuntis para o curso que comeza este ano no segundo ciclo de Educación Infantil, con idades comprendidas entre os 3 e os 5 anos.
O alcalde de Cuntis, Manuel Campos, explica que esta medida adoptada polo goberno local pretende minorar o efecto que o inicio do curso provocada nas economías domésticas das familias con menos recursos, ao tratarse dunha etapa escolar cunha importante necesidade de material de diferente tipo.
Ademáis de estar empadroados no concello de Cuntis e con residencia efectiva no mesmo, os alumnos deben convivir na unidade familiar cos solicitantes da axuda. Estes deben cumprir tamén cun parámetro económico para percibir a axuda, xa que os ingresos da unidade familiar non poden superar o límite establecido polo Concello.
A solicitude e a documentación requirida está a disposición das familias interesadas nas dependencias municipais de Servizos Sociais, na páxina web do Concello de Cuntis ou no número 986185468. Estas axudas poderán solicitarse no departamento de Servizos Sociais antes do 22 de setembro.
PROGRAMA DE FORMACIÓN DE ADULTOS
O programa de formación para adultos para a obtención do graduado escolar en Educación Secundaria é toda unha referencia na comarca grazas a boa media de alumnos que o conseguen.
Posto en marcha no ano 2003 cunha soa mestra, conta actualmente con dúas mestras con 25 horas semanais nas que imparten clases para unha media de 25 alumnos matriculados nos catro cursos da ESO e unha decena consegue cada ano o título académico.
Este programa, dirixido a persoas maiores de 16 anos que non terminaron con éxito a súa formación educativa, depende do financiamento do Concello. Así o goberno local destina en gran parte do presuposto á contratación de dúas docentes que permitan ter unha educación de calidade para o alumnado.
Para este 2023 o horario será de Luns a Xoves de 19 horas a 22 horas no Centro de Formación Ocupacional de A Ran.
O alcalde Manuel Campos mostrou a súa satisfacción por contar Cuntis cun programa deste calibre no que se busca a mellora de oportunidade laborais a través da educación.