Portas abertas para coñecer o buque histórico e aventureiro Atyla en Combarro o 1 de agosto
Por Redacción
Un acordo entre o Concello de Poio, Portos de Galicia e a Fundación Translatio permitirá que o buque histórico Atyla amarre en Combarro o vindeiro 1 de agosto e que a cidadanía poida visitalo.
Atyla é o único barco de madeira español que realiza viaxes de aventura a nivel internacional. Foi construído nos anos 80, pero o seu aspecto transporta aos pasaxeiros e visitantes a unha época máis afastada. O seu deseño está inspirado no século XVIII e a súa estrutura está composta totalmente de madeira, da denominada carpintería de ribeira.
Todas as persoas que así o desexen poderán gozar de visitas gratuítas en horario de mañá, entre as 12.00 e as 14.00 horas. Para participar é necesario anotarse na web atyla.org/combarro.
Durante a visita o público poderá pasear polo barco e descubrir a misión e as actividades que se desenvolven nel.