Teresa Táboas, elixida vicepresidenta da Unión Internacional de Arquitectura
Por Oskar Viéitez
A arquitecta pontevedresa Teresa Táboas foi elixida vicepresidenta da Unión Internacional de Arquitectos (UIA).
A elección tivo lugar esta fin de semana en Copenhague, que é a capital mundial da arquitectura no ano 2023 despois de que a UNESCO así o decidise.
A capital de Dinamarca foi a sede do congreso mundial número 28 da Unión Internacional de Arquitectos (UIA); un dos eventos de maior relevancia no ámbito da arquitectura e o urbanismo no que se reúnen líderes do sector para dialogar sobre o futuro das cidades.
Teresa Táboas foi elixida o 15 de maio de 2003 como decana-presidenta do Colexio Oficial de Arquitectos de Galicia, sendo a primeira muller en acceder ao cargo.
En consonancia co cargo, foi conselleira titular do Consello Superior dos Colexios de Arquitectos de España (CSCAE) entre os anos 2003-2005. Formou parte da Comisión de Vivenda do CSCAE e foi membro das comisións “Urban Issues” e “Environment and Sustainable Architecture” do Consello de Arquitectos de Europa (CAE), en representación do CSCAE.
Foi tamén representante do CSCAE na Asemblea da UIA celebrada en Istambul en 2005, nomeada presidenta da Comisión de Vivenda do CAE en abril de 2006 e foi Conselleira de Vivenda e Só da Xunta de Galicia desde agosto do 2005 ata abril de 2009.
Desde 2018 é Membro Honorario da Federación de Colexios de Arquitectos da República Mexicana (FCARM)