Sete anos de cárcere para un home que violou unha septuaxenaria que o acolleu na casa
Por Redacción
A Audiencia de Pontevedra condenou a sete anos de cárcere a un home que violou en xaneiro de 2020 a unha muller de 75 anos que o acollera na súa vivenda de Cambados por razóns de caridade.
O tribunal, segundo consta na sentenza facilitada polo Tribunal Superior de Xustiza de Galicia, considéralle autor dun delito de abuso sexual con penetración, agravado por razón de convivencia entre o agresor e a vítima.
As maxistradas da sección cuarta da Audiencia de Pontevedra explican na súa resolución que todas as probas presentadas no xuízo corrobora o testemuño ofrecido no seu día pola vítima, que non puido declarar ante o tribunal ao falecer en 2022.
A sentenza subliña que "fronte a toda a proba exposta" o acusado limitouse a negar os feitos.
Só recoñeceu que convivía coa septuaxenaria desde había sete anos e á que axudaba con todas as tarefas da casa, durmindo en habitacións separadas.
A pesar de que negou entrar na habitación da anciá para abusar sexualmente dela, os investigadores acharon restos do seu seme nas sabas da súa cama.