A confraría de Lourizán pretende instalar unha reixa contra os furtivos
Por Redacción
A patroa maior da confraría San Andrés de Lourizán en Pontevedra e presidenta da lonxa de Campelo, María del Carmen Vázquez solicitou ao delegado territorial da Xunta, José Manuel Cores Tourís, a súa colaboración para conseguir os permisos necesarios dende o Ministerio de Fomento de cara a poder instalar unha reixa na canalización pola que soen entrar os furtivos á praia de Praceres na zona de Malvinas.
"O que máis nos preocupa non é só que se leven marisco, senón que se leven o que está catalogado da zona C polo que pode provocar un problema sanitario", explicou María del Carmen Vázquez.
A maiores, a responsable do pósito tamén solicitou a mediación do delegado territorial para manter unha reunión co presidente de Portos de Galicia de cara a estudar o dragado do río, así como con Costas do Estado para a retirada de pedras de "polo menos dous dos actuais buratos cubertos con rocha cos que conta o fondo da ría o que nos permitiría recuperar a dinámica intermareal", engadiu Vázquez.