A Unión Europea e a Xunta investirán na mellora da produtividade dos bancos marisqueiros
Por Redacción
O delegado territorial da Xunta en Pontevedra, José Manuel Cores Tourís, visitou este luns o porto de Tragove en Cambados, acompañado polo alcalde da localidade, Luis Aragunde, e o presidente desta confraría, Benito González.
Durante a visita, o responsable da Delegación Territorial aproveitou para anunciar que O Salnés recibirá 340.000 euros destinados á mellora da produtividade dos bancos marisqueiros nas diferentes confrarías da comarca. En Cambados, a confraría levará a cabo, grazas a estas axudas, a rexeneración do banco marisqueiro da zona de Meloxo.
A Consellería do Medio Rural e do Mar publicou no Diario Oficial de Galicia, a comezos deste mes a resolución das axudas a través das cales preténdese incrementar as zonas de produción, dinamizar as zonas costeiras e crear máis postos de traballo nas diferentes áreas do litoral galego. A contía das axudas atópase cofinanciada polo Fondo Europeo da Pesca nun 75 %.
VIXILANCIA
Por outro lado, o delegado territorial, tamén fixo facer referencia á concesión dos convenios de colaboración para a xestión e conservación de zonas de produción e vixilancia, "que se están a informar nestes días as diferentes confrarías".
Neste senso, destacou que a cantidade destinada dende a Consellería de Medio Rural e do Mar a este fin roldará o 1,5 millóns na provincia de Pontevedra. A comarca do Salnés recibirá algo máis de 709.000 euros, destinada á asistencia técnica e a contratación de sete vixiantes durante 12 meses.