Máis de 720 caixas de expedientes administrativos de persoal e de multas do Concello serán destruídas
Por Redacción
A Comisión Cualificadora de Documentos Municipais, que depende da concellería de Réxime Interior, xestionada por Eva Vilaverde, aprobaban os estudos de identificación e avaliación de cinco seriies documentais e a eliminación de máis de 720 caixas con expedientes relacionados con multas de tráfico entre 1997 e 2012, permisos e vacacións, e rexistros manuais de asistencia do persoal do Concello entre 2007 e 2015.
Todo este materíal permanece no edificio do antigo Conservatorio, en Alfonso XIII, e no arquivo da planta -2 do edificio administrativo situado en Michelena. Agora, tras debaterse e aprobarse a medida na reunión do Consello de Avaliación documental de Galicia, o informe será trasladado á Consellería de Cultura para que aprobe definitivamente a destrución destes expedientes.
Trátase da terceira eliminación de arquivos administrativos que promove o Arquivo Municipal de Pontevedra desde 2022. A primeira, a finais dese mesmo ano, consistiu na eliminación de 1.440 caixas situadas no antigo Conservatorio con plusvalías entre 1961 e 1999 e impostos de circulación de vehículos entre 1967 e 2004.
Tamén se aprobou á espera de exposición pública un segundo expediente para eliminar documentación relacionada con taxas e prezos públicos. En total, trátase de 93 caixas de expedientes entre 1963 e 2005 gardados no antigo Conservatorio e nos baixos do Froebel.
O Arquivo Municipal traballa nun cuarto expediente de identificación, avaliación e destrución de arquivos municipais con preto doutras 2.000 caixas de documentación que se atopan en diversos espazos.
En total, o Concello de Pontevedra realizou a expurgación de máis de 2.250 caixas de documentos que carecen de valor na actualidade e dos que sempre se conservan algúns exemplares como material documental e estético.
Esta actuación intégrase no proceso para modernizar a administración municipal que acomete o Goberno local nos últimos anos.