Nomeado o novo goberno no Concello de Cuntis
Por Redacción
O alcalde de Cuntis, Manuel Campos, procedeu este venres ao nomeamento das áreas do Goberno Local. Estas catro serán a de Facenda, Persoal, Urbanismo, Contratación, Medio Rural, Seguridade Cidadá, Emerxencias e Promoción Económica e Emprego; Cultura, Deporte e Educación; Servizos Sociais, Igualdade, Xustiza e Sanidade; e Turismo, Patrimonio e Medio Ambiente.
O alcalde Manuel Campos e a primeira tenente de alcalde, Conchy Campos, repartiranse as áreas de Facenda, Persoal, Urbanismo, Contratación, Medio Rural, Seguridade Cidadá, Emerxencias e Promoción Económica e Emprego. Campos será outra lexislatura e a principal responsable do goberno despois do alcalde e ostentara a representación do concello no Consello Escolar Municipal.
Por outra banda, as áreas de Cultura, Deporte e Educación pasan a mans de José Antonio González Fontán que se incorpora ao goberno local nesta lexislatura, e que compartirá co tenente de alcalde a área de deportes.
A concelleira da área de Servizos Sociais, Igualdade, Xustiza e Sanidade será Ana Isabel Loureiro Fuentes, que xa o viña facendo na anterior lexislatura e que é unha das áreas máis importantes do Concello.
O novo concelleiro Roberto Caeiro Duarte asumirá a área de Turismo, Patrimonio e Medio Ambiente, e a xestión das actividades da Biblioteca Pública municipal. Caeiro tamén será o novo portavoz do Grupo municipal do PSOE e voceiro do Goberno.
No Pleno de organización tamén se aprobou a organización das diferentes comisións informativas e dunha única dedicación exclusiva ao alcalde, que terá unha retribución bruta anual de 35.893,76, así como, as asistencias a plenos dos concelleiros que serán igual que na pasada lexislatura. Contando cunha retribución de 60 euros na comisión de goberno, 50 euros asistencia a plenos e 30 euros asistencia a comisións.
Ao mesmo tempo aprobaron a delegación de membros en órganos colexiados; acordaron delegar parte das competencias do mesmo na comisión de goberno para axilizar moito máis os trámites e non ter que pasar por pleno moitos trámites; e, a petición do BNG incluirán en tódolos plenos ordinarios na dotación de conta un punto específico sobre as xuntas de goberno.