Santiago asumirá os casos máis graves e a cirurxía cardíaca pero non as consultas de Cardioloxía
Por Oskar Viéitez
Un grupo de cardiólogos do Complexo Hospitalario Universitario de Santiago (CHUS) mantiveron este mércores en Pontevedra a primeira xuntanza sobre a nova organización asistencial que comeza en febreiro. A partir do próximo mes, 300.000 pacientes procedentes da área sanitaria de Pontevedra e O Salnés terán o CHUS como hospital de referencia para tratamentos de hemodinámica e cardioloxía intervencionistas.
Segundo se abordou nesta reunión de traballo este cambio supoñerá que os cardiólogos de Santiago se despracen para facer hemodinámica na sala do Hospital provincial de Pontevedra, onde se atenderán aos pacientes cun cadro menos grave. Pola contra aqueles casos máis complexos serán asistidos en Santiago de Compostela.
As consultas de Cardioloxía continúan como ata agora
Na reunión tamén se estudou a fórmula para adecuar os recursos tecnolóxicos de Pontevedra para a atención cardiolóxica co objectivo de minimizar os desprazamentos de pacientes de Pontevedra e O Salnés.
Como solución contémplase que hemodinamistas do CHUS acudan a Pontevedra e que só se asuman os os casos máis graves ademais da cirurxía cardíaca, pero non as consultas de Cardioloxía, que continúan como ata agora.
Os especialistas do CHUS afirman que o Hospital de Santiago dispón de medios modernos infrautilizados e dun grande equipo médico que inclúe catro electrofisiólogos e cinco hemodinamistas.
A partir dagora este tipo de reunións manteranse de forma periódica para coordinar o traballo e avaliar os resultados da nova organización asistencial.