As temperaturas desta primavera foron case dous graos máis altas e houbo un 24% menos de chuvias das esperadas
Por Redacción
O avance do informe estacional de MeteoGalicia sinala que a nosa comunidade rexistrou unha primavera meteorolóxica moi cálida e seca.
As temperaturas desta primavera, cunha media de 14,2 graos, foron case dous graos máis altas do esperado neste período. Temos que remontarnos ao ano 2011 para atopar un precedente máis cálido.
Estes datos foron ofrecidos este mércores no transcurso dunha visita da conselleira de Medio Ambiente, Ángeles Vázquez, ao radar meteorolóxico de Cuntis, unha das "principais ferramentas" coas que conta a Xunta para a realización das predicións de MeteoGalicia. A súa situación permite unha excelente visión das frontes que chegan á Comunidade desde o Atlántico e o Cantábrico así como una monitorización precisa da evolución dos fenómenos meteorolóxicos.
No que atinxe ás precipitacións, a Galicia rexistrou unha primavera moi seca cun 24% menos de chuvias das esperadas. Máis polo miúdo, o mes de marzo foi lixeiramente húmido -117 litros por metro cadrado de media- e abril foi seco -68 litros por metro cadrado-.
No caso de maio, as precipitacións estiveron asociadas aos fenómenos tormentosos, polo que aínda que houbo zonas con máis chuvia da habitual, choveu un 37% menos do normal neste mes, polo que foi moi seco.
Nos últimos tres meses rexistráronse en Galicia preto de 13.700 raios, dos que o 99% (13.583) corresponden aos últimos 6 días de maio.
Este fenómeno repetiuse nos primeiros cinco días de xuño, cando se rexistraron un total de 8.556 raios.