Gustaríache xestionar o quiosco da Finca de Briz por cinco anos?
Por Oskar Viéitez
O Boletín Oficial da Provincia de Pontevedra publicou este xoves o anuncio da licitación para renovar a concesión do quiosco que se atopa na Finca de Briz.
Este espazo, que é un módulo prefabricado en pleno corazón da finca e cunha terraza de 12 metros cadrados de espazo, é un ben de dominio público, que está destino á venda de produtos alimenticios, lambetadas e bebidas.
Tal e como se pode ler no prego, o quiosco entrégase nas condicións nas que se atopa actualmente, sendo de conta da persoa adxudicataria os labores de limpeza e posta a punto do mesmo para o exercicio da actividade.
Unha vez que o concesionario leve a cabo as adaptacións no quiosco, estará obrigado a conservalo en perfecto estado, debendo entregalo nas mesmas condicións no momento de rematar a concesión. Serán por conta do concesionario todas as obras de reforma, reparación, conservación e mantemento que deban facerse no quiosco.
O prazo de duración da concesión será de cinco anos, a contar desde o día seguinte á firma do documento administrativo no que se formalice a concesión. Este prazo ten o carácter de improrrogable, polo que, unha vez cumprido o mesmo, reverterá o quiosco a este Concello.
O canon a satisfacer pola concesión terá o carácter de taxa, conforme á ordenanza fiscal reguladora da taxa por ocupación privativa ou aproveitamento especial de dominio público. O canon mínimo fíxase en 607,93 euros anuais. As persoas licitadoras determinarán na súa proposición o canon que ofertan, que en ningún caso poderá ser inferior a esa contía.
AUTORIZACIÓN PARA AS FOGUEIRAS DE SAN XOÁN E SAN PEDRO
Por outra banda, o Concello de Marín abre o prazo para solicitar a instalación de fogueiras tanto para a noite de San Xoán o 23 de xuño como na festividade de San Pedro, desde este xoves e ata o día 20, ambos inclusive.
O formulario para solicitar as cacharelas pode descargarse aquí. Para presentalo, pode facerse a través da sede electrónica ou de xeito físico no edificio consistorial.
Ademais, está previsto que se acendan tamén as dúas fogueiras públicas que normalmente se colocan na vila: a de Cantodarea, organizada polo Foleón de Amijos e Vesiños de Cantodarea, e a da Barriada de Mogor.