Case 400.000 euros do canon de explotación do encoro do Umia fomentarán accións sociais e educativas
Por Redacción
O Consello da Xunta celebrado este venres 19 autorizaba a renovación do convenio de colaboración entre a Consellería de Infraestruturas e Mobilidade e os concellos de Caldas de Reis, Cuntis e Moraña.
O acordo establece que Augas de Galicia investirá preto de 400.000 euros do canon establecido de explotación do encoro da Baxe, do río Umia, ao financiamento de actividades educativas e sociais nos tres municipios.
Neste convenio tamén participa como entidade colaboradora a Deputación de Pontevedra, que se encarga de administrar estes fondos procedentes do executivo autonómico.
A empresa titular da explotación hidroeléctrica da presa situada no municipio de Caldas de Reis está obrigada ao pago do canon, que termina derivando neste diñeiro destinado aos municipios, segundo establece a concesión da explotación outorgada por Augas de Galicia, organismo dependente da Xunta de Galicia.
Cada un dos concellos recibe algo máis de 130.000 euros para realizar actividades sociais e educativas ata o 31 de decembro deste 2023.
A través deste procedemento, estes municipios recibiron máis de sete millóns de euros, desde 2002 ata 2022, cando se iniciou este sistema.