Un almacén de seguridade con 200 quilos de haxix, un histórico narcotraficante e o intento frustrado de sacar a droga
Por Natalia Puga
A última operación antidroga desenvolvida pola Policía Nacional na comarca de Arousa, pola que dúas persoas xa ingresaron en prisión, pechouse coa intervención de 200 quilos de haxix que estaban ocultos nun almacén de seguridade en Vilanova de Arousa. 100 seguían gardados e os outros 100 estaban a ser retirados no momento da detención dos sospeitosos.
A operación, bautizada Baroña, desenvolveuse a semana pasada e o mércores a maxistrada do Xulgado de Instrución número 1 de Vilagarcía decretou o ingreso en prisión dos dous, aínda que un eludible.
Para o principal sospeitoso, un histórico coñecido das Forzas e Corpos de Seguridade do Estado pola súa relación coa distribución da droga na comarca do Salnés, ditou o ingreso en prisión provisional, comunicada e sen fianza. Para o outro, o ingreso en prisión provisional, eludible baixo fianza de 30.000 euros.
Segundo a información facilitada pola Policía Nacional, as investigacións comezaron a principios do presente mes de maio, cando os axentes tiveron coñecemento de que unha vivenda construída nunha leira estaba a ser utilizada como almacén específico de seguridade dunha partida de droga que pertencía a unha organización criminal asentada nesa comarca.
O pasado martes, 9 de maio, tras varios días de vixilancia, os axentes observaron que un vehículo con dous ocupantes accedía ao inmoble.
Unha vez que abandonaron o lugar, os axentes procederon a darlle o alto cando pretendían incorporarse a un vial. Tras identificar os seus ocupantes, realizouse un rexistro do vehículo. No maleteiro portaban unha gran cantidade do que, a primeira ollada, parecía haxix.
Tras confirmarse que se trataba desta substancia, comprobouse que pesaba 100 quilos.
A vivenda estivo custodiada ata que se procedeu á súa entrada e rexistro, onde se interviñeron outros 100 quilos de haxix, un de cocaína e dúas bolsas de marihuana que lanzaron un peso de oito quilogramos.
Relacionadas:
-
Dous detidos e 200 quilos de haxix incautados nunha nova operación antidroga en Arousa
Por Redacción | Creada e actualizada