A reforma integral do pavillón de Fontecarmoa custará 2,1 millóns de euros
Por Redacción
O Concello de Vilagarcía de Arousa volveu a sacar a licitación o proxecto de reforma integral do pavillón número 1 de Fontecarmoa, unha vez cumprimentado o trámite de ampliación do orzamento debido ao sobrecusto ocasionado polo incremento dos prezos dos materiais.
Finalmente investiranse na reforma 2.129.428 euros, cunha obra que terá un prazo de execución de sete meses.
As empresas interesadas en realizar esta obra dispoñen de prazo ata o 1 de xuño para presentar as súas propostas a través da Plataforma Pública de Contratación, sinala o Concello.
Trátase dunha actuación de gran envergadura ao incluír a reparación da estrutura, a substitución da cuberta, a mellora de envolventes e o acondicionamento interior do pavillón, así como a instalación de sistemas de enerxía fotovoltaica, a renovación da instalación eléctrica e a de climatización.
Con esta reforma o ocjetivo é resolver as carencias e deficiencias que presentan actualmente as instalacións, construídas hai máis de 40 anos, especialmente en materia de humidade e condensación, que dificultan a práctica deportiva.
Dentro do proxecto contémplase ademais a renovación da zona de vestiarios, aseos e o perímetro da cancha.
Dentro do orzamento total de 2,1 millóns de euros, a administración local financiará a maior parte, con 1.353.874 euros asignados directamente e 425.554 euros con cargo aos fondos do Plan Concellos da Deputación. Os 350.000 euros restantes achegaraos a Secretaría Xeral para o Deporte da Xunta de Galicia.