"Atemorizada, acosada e vixiada" polas continuas mensaxes e chamadas do seu ex, que "lle impedían o descanso e unha vida en paz"
Por Natalia Puga
Seis meses de prisión, un ano e 1 día de privación do dereito á tenencia e porte de armas e prohibición de achegarse e comunicarse coa súa ex. Esa é a condena que deberá cumprir un pontevedrés que, tras a ruptura coa súa parella, chamouna de forma reiterada a ela e aos seus familiares e amigos.
A vítima puxo fin á relación en marzo de 2022, pero esta ruptura "nunca foi aceptada" polo acusado, que actuou, segundo dous xulgados, "co fin de menoscabar a integridade psíquica" dela e "tentar dobregar a súa vontade e que ela retome a relación con el".
Así, entre mediados de agosto e o 1 de setembro de 2022, o home chamou ao teléfono móbil do seu ex en repetidas ocasións, chegando a realizar ata 40 chamadas desde números ocultos, a maioría reiteradamente e de madrugada, e utilizando diversos teléfonos móbiles para asegurarse a comunicación con ela.
Ademais, chamou por teléfono a familiares, amigos e compañeiros de traballo dela tamén reiteradamente, e acudiu a casa da nai dela, onde vivía desde a ruptura, chamando ao porteiro da casa varias veces e de forma insistente. Chegou a falar coa nai do seu ex parella para "tratar de forzar" que ela falase con el a pesar da súa negativa.
Ademais, reprochoulle de madrugada a un amigo da parella que estaba coa súa ex a pesar de que el estaba a pasar a fin de semana coa súa noiva nun hotel.
Como consecuencia destes feitos, a muller "estaba atemorizada, acosada e vixiada" e causoulle malestar polas continuas mensaxes e chamadas, que "lle impedían o descanso e unha vida en paz".,
O Xulgado do Penal número 4 de Pontevedra condenouno e, a pesar da súa sentenza condenatoria, o acusado recorreu. Finalmente, a sección cuarta da Audiencia Provincial confirmou a sentenza.
O home acabou condenado por un delito de coaccións e, para protexela a ela, está condenado á prohibición de aproximarse a menos de 200 metros da súa vítima, o seu domicilio, lugar de traballo ou outro no que poida atoparse por tempo de dous anos. Tamén á prohibición de comunicarse directamente e por calquera medio con ela por dous anos.