Agóchase no baño do Rúas para escapar da policía tras protagonizar unha liorta doméstica
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Un mozo escóndeuse no baño do Hotel Rúas para escapar dos axentes da Policía Local que o buscaban por unha pelexa doméstica.
Sucedeu o pasado día 8 de xaneiro ás 13.40 horas. O ruído dunha forte discusión que se desenvolvía no interior dun piso na rúa Cobián Roffignac chamou a atención dos peóns que transitaban pola beirarrúa que alertaron a unha patrulla da Policía Local.
Segundo informaron dende a Xefatura local, os axentes municipais acudiron á vivenda da que procedían os berros e os golpes, e ao abrir o portal do edificio un mozo saíu correndo en dirección cara á zona monumental. Os axentes municipais saíron en persecución deste home de 30 anos que, ao sentirse acurralado, escondeuse nos baños do Hotel Rúas. Finalmente accedeu a falar cos axentes sendo indentificado.
Mentres tanto varios policías acudiron á vivenda para auxiliar a compañeira do home fuxido. Aínda que no interior do piso había signos evidentes dunha actividade violenta, con mobles e aparellos rotos e tirados polo chan, esta muller de 33 anos, rexeitou a posibilidade de presentar calquera denuncia contra o seu compañeiro, asegurando aos axentes que o mozo estaba en tratamento e que ela o quería moito.
A Policía local trasladou un informe destes feitos ao Xulgado.