Froiz abre este venres o seu 'cash' no Vao e ultima o seu renovado supermercado de Echegaray
Por Alejandro Espiño
O Grupo Froiz segue reordenando as pezas do seu proxecto empresarial en Pontevedra. Tres son as novidades que se irán sucedendo nas próximas semanas e que afectarán ao Cash Froiz e aos establecementos de Echegaray e Paseo de Colón.
O acontecemento máis inmediato será a apertura do Cash Froiz no polígono do Vao, que abrirá as súas portas este próximo venres 12 de maio.
A nova nave, que substitúe ao actual emprazamento na Barca, conta con 1.400 metros cadrados de superficie e máis espazo exterior de aparcamento.
Desde a compañía sosteñen que as súas instalacións son "máis amplas, cómodas, modernas e ecoeficientes" e que todos os materiais para no acondicionamento, a iluminación e a climatización "conseguen un consumo enerxético inferior a unha tenda convencional".
Ademais, ao contar cunhas instalacións máis amplas, Froiz ampliou o persoal deste establecemento, que pasou dos trece actuais ata os dezanove.
Pola súa banda, o supermercado que Froiz ten na rúa Echegaray, que está a ser obxecto dunha profunda remodelación, reabrirá o venres 19 de maio, segundo as previsións da compañía alimenticia, ampliando o seu horario comercial, entre as 09:00 e as 22:00 horas.
Así, o establecemento ampliou a súa sala de vendas nuns 200 metros cadrados e pasa a contar con 1.000 metros cadrados, distribuídos en dous locais. Un deles, ademais, contará cun aparcadoiro para clientes con nove prazas de aparcamento.
Con esta ampliación, Froiz ofrecerá aos seus clientes un maior variado e variedade en produtos frescos, adega, droguería, refrixerados, conxelados e alimentación xeral.
Un día antes da reapertura deste supermercado pechará as súas portas o que Froiz ten en Paseo de Colón. Desde o xoves 18 de maio todo o persoal asignado a este centro será recolocado noutros establecementos da cidade.