Primeiro 'diálogo utópico' con Sés e Cristina Botana no Convento de Santa Clara
Por Mónica Patxot
Este xoves tivo lugar o primeiro dos diálogos utópicos no Convento de Santa Clara, con a cantautora Sés e a arquitecta Cristina Botana que conversaron sobre o papel da música e o urbanismo na construción de narrativas de futuro e sobre as interseccións posibles ou desexables entre ambas disciplinas.
"Banda sonora para unha nova forma de habitar o mundo", foi o título desta primeira conversa á que hoxe seguirá outro "Diálogo Utópico" coa enxeñeira informática Laura M. Castro e a escritora e activista María Reimóndez que falarán sobre as distintas formas de elaborar relatos e realidades utópicas, da literatura ao mundo virtual e volta na palestra Construíndo relatos, construíndo realidades.
As conversas contan tamén coa participación de Iseo a Moura, do colectivo Narración Oral Galega (NOGA), que introducirá e pechará os diálogos con historias que nos permitan buscar no pasado elementos a recuperar para un futuro.
As xornadas rematarán o sábado 29 de abril cunha representación teatral sobre cambio climático na praza da Curtidoira da man de As Fillas Bravas.
As Fillas Bravas representarán o mito de Casandra, unha obra na que tres mulleres maiores tratan de entender o cambio climático e facerlle fronte aplicando os saberes e a experiencia dunha vida longa no rural.
Ao mesmo tempo, é unha obra con perspectiva de xénero á procura de personaxes femininas empoderadas, colocando o foco nunha muller afirmativa, autónoma, creativa e implicada na colectividade.
A entrada será de balde até completar aforo, en horario de 13:00 a 14:00 horas.