Carmen Uhía Martínez, Raia de Ouro 2023 pola súa traxectoria vinculada á venda tradicional de peixe
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Carmen Uhía Martínez, peixeira referente en Portonovo de 99 anos, será recoñecida este ano coa Raia de Ouro do Concello de Sanxenxo pola súa "longa traxectoria vinculada á venda tradicional de peixe".
Desde o Concello sinalan que se trata dunha traballadora incansable que, con apenas 10 anos, percorría descalza o municipio cunha patela sobre a cabeza chea de peixe. Será recoñecida nun acto que se celebrará o luns 1 de maio ás 12.30 horas na Casa Mariñeira de Don Fernando.
"Levabamos do peixe que houbera e chegara á lonxa de Portonovo: Sardiñas, xurelos, fanecas... De luns a domingo iamos ata Vilalonga andando, facíamos unha parada no Vinquiño e logo seguiamos. Eran outros tempos!", recorda.
Nesa época, cando chegaba á casa tiña que atender os fillos e, segundo a tempada, ir ás leiras. O seu marido era mariñeiro no mar e ela, en terra. “Se querías ter un peso había que traballar”, asegura.
Unha sobriña abriulle a posibilidade de ir con ela vender á praza de abastos de Pontevedra e aí xubilouse. Lembra que "vendía moito e gustábame o trato educado coa xente. Aínda recordo como as clientas dicían: Cómpralle a Carmen que o peixe dela parece que medra na tixola. Sempre lle botaba algún peixiño de regalo".
Aos seus 99 anos conta cunha memoria privilexiada e unha boa forma física. Non perdoa o seu paseo polas mañás ata Montalvo coa súa amiga Lola e reza o rosario "de cabeza". O seu secreto pode ser a ausencia de lácteos na súa dieta ou no anaquiño de pan despois de cada comida como sobremesa.
O premio colleuna por sorpresa e non cre que mereza "nin unha raia de ouro nin de prata". Refraneira e retranqueira, Carmen chegará o luns a recoller o seu premio precedida polos Gatiños de Portonovo á Casa Mariñeira de Don Fernando. Alí agardará a súa familia, fillos,netos, bisnetos e tataraneta e tamén os seus veciños e amigos.
Relacionadas:
-
Nove residentes en Sanxenxo superan o século de vida
Por Redacción |
-
Carmen Uhía Martínez recibe a Raia de Ouro con aclamacións
Por Redacción |
-
'Sanxenxo Fala' enche de cultura o municipio durante o mes de maio
Por Redacción |
-
A Festa da Raia encherá de música e animación as rúas no "Portonovo gastronómico"
Por Redacción |