O pavillón co que Pontevedra quere ser a referencia galega do tenis de mesa
Por Alejandro Espiño
Pontevedra conta co mellor equipo de tenis de mesa de toda Galicia. Un club, o Monte Porreiro, obrigado a malvivir con instalacións deportivas que non son as adecuadas para a práctica deste deporte. A ese problema pretende poñer solución o Concello.
O alcalde, Miguel Anxo Fernández Lores, e o edil de Deportes, Tino Fernández, presentaron este xoves o proxecto para a construción dun novo pavillón que estará dedicado exclusivamente ao tenis de mesa. Estará en Monte Porreiro e substituirá ao vello pavillón do barrio.
O goberno municipal estima que o investimento necesario para materializar este ambicioso pavillón chegará ata os 3 millóns de euros. A intención do Concello é que poida estar terminado e xa en funcionamento ao longo do próximo ano 2024.
A proposta para este pavillón foi deseñada polo estudo de arquitectura uña+amandi, os mesmos que están a rehabilitar a casa do concello da Praza de España. Apostaron por unha instalación caracterizada, segundo Fernández Lores, polo seu deseño e modernidade.
O pavillón terá unha pista de 1.200 metros cadrados de superficie, que poderá dividirse para competicións de alto nivel. Superará os cinco metros de altura, o mínimo que necesita este tipo de instalacións deportivas e terá unha bancada con asentos para 200 persoas.
Ademais, este novo recinto deportivo contará cos sistemas de eficiencia enerxética "máis avanzados", destacou o rexedor pontevedrés, entre eles placas fotovoltaicas e climatización, e estará completado cun ximnasio, almacéns e baños.
Debido á orografía do terreo, o pavillón terá varios niveis de altura. O intermedio será o que permita o acceso á pista, mentres que o superior farao ás bancadas. No semisótano, que estará a nivel da parcela, haberá instalacións complementarias.
A este respecto, o pavillón prevé cubrir a necesidade de espazos do colexio Fina Casalderrey, co que estará conectado a nivel peonil, para a organización de actividades extraescolares. Será cunha área de 750 metros cadrados cunha pista multiusos.
O alcalde sostivo que o Concello xa ten consignación orzamentaria para abordar unha actuación "que sacaremos a contratación o antes posible". Hai acordo, ademais, coa Xunta de Galicia para que se implique neste proxecto.
Así será porque, segundo avanzou Miguel Anxo Fernández Lores, Pontevedra pretende sumar a tecnificación deportiva deste deporte ás disciplinas do CGTD, que utilizará este pavillón polas mañás, mentres que polas tardes compartirao co Tenis de Mesa Monte Porreiro.
"Queremos que todo o tenis de mesa de elite e de base de Galicia pase por este pavillón", defendeu Fernández Lores, que celebrou que a curto prazo Monte Porreiro contará cunha instalación para a práctica deste deporte "a máximo nivel".
O concelleiro de Deportes, pola súa banda, subliñou que con este pavillón no goberno municipal "seguimos cumprindo os compromisos coa cidade e con Monte Porreiro", asegurando que "estamos a dar pasos decididos" para materializalos canto antes.
Tino Fernández destacou que "aquí non vimos a vender fume", senón a presentar proxectos "que se van a facer" e que van ter visibilidade nun espazo de tempo "relativamente curto".
Relacionadas:
-
O TM Monte Porreiro supera o invicto Priego e sela a súa clasificación europea (4-1)
Por Redacción |
-
Tripla medalla de bronce para o TM Monte Porreiro no nacional de Xaén
Por Redacción |
-
Vílchez, do TM Monte Porreiro, proclámase campión de España absoluto no dobres masculino
Por Redacción |
-
O futuro complexo deportivo da Parda terá un pavillón multideporte, outro de ximnasia e un rocódromo de competición
Por Alejandro Espiño |
-
Máis de dous millóns de euros para converter o pavillón de Monte Porreiro na casa do tenis de mesa
Por Diego Espiño |