Estafan diñeiro e xoias a unha pontevedresa co timo do tocomocho
Por Oskar Viéitez
A Policía Nacional detivo a dúas persoas por realizar a estafa do tocomocho en Pontevedra e A Coruña. Unha muller de Pontevedra entregou 600 euros en metálico, así como diferentes xoias, valoradas en 6.000 euros a unha parella de estafadores que a enganaron con este ardid.
Ocorreu o pasado 27 de febreiro. Ao día seguinte, e co mesmo ardid, a vítima foi outra muller de avanzada idade que cando paseaba soa polo centro da Coruña, achegóuselle unha muller nova que, cuns boletos na man, pediulle que lle indicase onde podería comprobar se estaban premiados, xa que alguén lle dicía que si o estaban.
Seguidamente, achégaselles outro home, que se ofrece a comprobar se os referidos billetes teñen premio. Abandona entón o lugar, para regresar rápido co número deses boletos apuntado nun papel, afirmando que na oficina de loterías dixéronlle que ese número está premiado.
Para facelo máis crible, diante da vítima, realiza unha chamada de teléfono onde, supostamente, desde esa oficina de loterías confírmanlle de novo este feito. É entón, cando a muller que posuía os boletos, dilles que ela é analfabeta e que prefire non acudir ao banco para cobrar o premio. Ofrécelles a ambos a posibilidade de que lle compren o boleto premiado. Rapidamente, o home saca dos seus petos un feixe de billetes para pagar o seu parte e ofrécese a achegar a vítima a un banco para que saque diñeiro e, entre ambos, realicen esta compra. A vítima cre o engano, e accede a subirse nun vehículo con estas dúas persoas, que a levan a diferentes bancos da cidade, onde extrae un total de 9.000 euros para comprar o seu parte do referido boleto.
Un vez que lles entrega o diñeiro, dinlle que se baixe do vehículo para comprarlles algo para comer, momento no que arrincan o vehículo e abandonan o lugar.
O pasado día 3 de marzo, os dous autores destes ilícitos son detidos en Santiago de Compostela, sendo recuperado o diñeiro e as xoias roubadas. Foron postos a disposición o pasado día 4 de marzo.