"O botellón rexistra menor incidencia de delitos que outras zonas de concentración de ocio nocturno”
Por Redacción
"A realidade é que as zonas de botellón rexistran menor incidencia de delitos que outras zonas de concentración de ocio nocturno". Así o afirmou este xoves a subdelegada do Goberno en Pontevedra, Maica Larriba, despois de presidir a Xunta Provincial de Seguridade e analizar xunto aos mandos policiais a problemática dos botellóns en Vigo e Pontevedra.
Larriba sinalou que os responsables policiais son "conscientes dos contratempos que esta actividade produce", pero trasladaron que nos lugares das dúas principais cidades da provincia nos que se celebran "non existe preocupación relacionada coa seguridade cidadá".
Isto non evita unha "elevada" actividade policial para velar pola seguridade nos botellóns. No caso de Pontevedra, realizan unha "importante labor de control".
Segundo sinalou a subdelegada, a maior parte dos servizos realizados nos botellóns de Pontevedra tiveron que ver nos primeiros dez meses do ano con labores de auxilio ante intoxicacións etílicas.
Así, só houbo dúas intervencións por roubos e outras dúas por lesións.
Larriba presidiu este xoves a Xunta Provincial de Seguridade, á que asistiron o comandante da Garda Civil Óscar Graña; comisario provincial da Comisaría de da Policía Nacional, Juan José Díaz; o comisario xefe da Comisaría de Vigo-Redondela, Ramiro García; e o comandante da Garda Civil de Tráfico na provincia, Antonio Pérez Piteira.
Durante a reunión tamén se analizaron os datos de tráfico e a subdelegada destacou que aínda que "nunca se pode falar de cifras positivas cando hai falecidos", o número de mortos nas estradas provinciais baixou nos dez primeiros meses de 2022. Ascende a 10 fronte aos 21 do mesmo período de 2021.
O número de accidentes con feridos sobe un 13%.
No que vai de 2022 houbo 153.762 controis de alcoholemia e 4.426 probas foron positivas.
No relativo ás drogas, o 61,42% das probas realizadas deron positivo. Do total de condutores denunciados, o 77,13% deron positivo en consumo de cannabis. A segunda substancia máis detectada foi a cocaína e a terceira, as anfetaminas.
Relacionadas:
-
"Non hai persoal policial suficiente para poder actuar nas zonas de botellón", alerta a Confederación Española de Policía
Por Redacción |
-
Preocupación veciñal por varios roubos en vivendas de Viascón
Por Oskar Viéitez |
-
Unha acción informativa no 'Botellódromo' tratará de previr o consumo de substancias aditivas
Por Oskar Viéitez |
-
Alertan dun aumento de episodios violentos e agresións sexuais durante as saídas nocturnas dos menores
Por Redacción |