![](/web/cache/scene/uploads/fotos/foto/3a6/_S7QytKoutjK3UsovKMnMzytWsi62MgJyq/Lzc52L8gt0zCwMdI_/_wNDHSSU/NKUot0SvILlKxrAQ==_/634019d6eb-carlos-oroza-02.jpg)
© Concello de Pontevedra
O CIFP Carlos Oroza recibe o premio Loureiro de Ouro na Festa das Cunchas
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Manuel Hermo, director do CIFP Carlos Oroza, recollía este venres no Mercado das Cunchas o premio Loureiro de Ouro, un galardón gastronómico que outorga o Concello con motivo da Festa das Cunchas, que se celebra na Praza de España ata o domingo 9 de outubro.
Yoya Blanco, concelleira de Promoción Económica, manifestaba que o centro de hostalería situado en Mourente é un elemento identificativo da cidade formando a numerosas xeracións de profesionais deste sector. "Sobran os motivos para darlle un galardón como este a un centro que é un aceno de identidade da nosa cidade, que forma parte dela dunha forma moi activa", asegurou.
Tamén recoñeceu que o CIFP é fundamental para que Pontevedra opte a converterse en Capital Española da Gastronomía 2023, unha opción que se coñecerá o 16 de novembro, segundo afirmou a concelleira. "Estamos nun sprint final para converternos en Capital Española da Gastronomía e queremos que o xurado vexa que non só temos respaldo institucional e empresarial, senón da propia cidadanía", argumentou.
O director do centro mostraba a súa satisfacción ao recoller o galardón lembrando que levan 26 anos na cidade con ex estudantes que se converteron en emprendedores montando o seu propio negocio, mentres outros se trasladaron ao exterior promocionando a cidade de Pontevedra a nivel internacional. Hermo indicaba que desde o inicio da actividade no CIFP sempre se quixo ter visibilidade formando parte do modelo de cidade. Afirmou tamén que Pontevedra ten o mellor produto, cociña e persoas para converterse en Capital Española da Gastronomía.
No acto tamén participaba Rubén González Vallejo, ex alumno, chef do restaurante El Cafetín e gañador da Batalla das Cunchas 2022, encargado de entregar o premio. Manifestaba durante a entrega que é "un orgullo" entregar esta distinción a un centro ao que segue ligado para ver como melloran a través de proxectos como o da creación da horta ou en I+D+i. Considera "moi merecido" este premio porque "se están a facer ben as cousas".
Na entrega tamén se atopaban presentes a vicedirectora do Carlos Oroza, Pilar Tallón; e o concelleiro de Benestar Social, Marcos Rey. Na súa primeira edición, o premio Loureiro de Ouro recaera no Gremio de Mareantes, en representación do barrio pontevedrés da Moureira.
Relacionadas:
-
O Carlos Oroza intégrase na nova rede estatal de excelencia de formación profesional
Por Oskar Viéitez |
-
Máis de 10.000 tapas vendidas consolidan a Festa das Cunchas na súa segunda edición
Por Redacción |
-
A ameixa de Rubén González triunfa na segunda Batalla das Cunchas de Pontevedra
Por Redacción & Mónica Patxot |
-
Vinte locais de hostalería de Pontevedra activan a 'ruta das cunchas'
Por Alejandro Espiño & Mónica Patxot |
-
A segunda edición da Festa das Cunchas reforza a candidatura de Pontevedra a capital española de la gastronomía
Por Manu Otero |