O Gorgullón e o centro histórico, punto de partida para o novo contrato de mantemento
Por Redacción
Polo Gorgullón, unha rúa que este verán tivo unha gran trasfega de peregrinos, comezaron os primeiros traballos de reparación que se realizan na cidade no marco do novo contrato para o mantemento dos espazos públicos urbanos.
Adxudicado a finais de xuño á empresa Elsamex por 726.000 euros anuais, o novo contrato garante a presenza permanente de tres brigadas na rúa e, a maiores, un equipo de retén, para manter no mellor estado posible as rúas e prazas da cidade.
Ademais das obras no Gorgullón, tamén se autorizaron actuacións no centro histórico, co fin de resolver pequenas deficiencias de cara á celebración da Feira Franca.
Na vindeira semana está proxectado o comezo dos labores de mantemento nas contornas dos centros de ensino e en diversos puntos da cidade, entre eles a avenida de Lugo.
Todos estes traballos son complementados pola brigada de obras municipais.