Aumentan ata os 726.000 euros anuais o contrato de mantemento de espazos urbanos
Por Alejandro Espiño
Ata os 1,45 millóns de euros, a razón de 726.000 euros por cada unha das dúas anualidades, ascenderá o custo do contrato municipal para o mantemento dos espazos urbanizados na cidade de Pontevedra. Son uns 400.000 euros máis que na actualidade.
A portavoz do goberno municipal, Anabel Gulías, explicou que este contrato, que comezou este luns con todo o seu proceso administrativo, enmárcase na "prioridade" para o Concello neste mandato de ter os espazos urbanos "en óptimas condicións".
A través deste contrato, que complementa o traballo das propias brigadas municipais, acométense, entre outras actuacións, o pavimentado de rúas, a reparación de lousas, a substitución de mobiliario urbano ou a rehabilitación de firmes.
Todo iso está coordinado pola área municipal de mantemento de espazos públicos, dirixida pola edil Eva Vilaverde, que se encarga exclusivamente destas actuacións.
O novo contrato incluirá a incorporación dunha segunda brigada de obras, de forma que haxa dous equipos de operarios traballando permanentemente neste tipo de traballos de mantemento e emendar as deficiencias detectadas.
Outra das novidades será a división deste contrato en dous partes, para licitar de maneira independente a creación dunha APP informática que mellore a comunicación entre os cidadáns e o servizo que se encarga do mantemento dos espazos urbanos.
Esta futura plataforma estará integrada dentro do sistema de información xeográfica creado este mandato baixo o nome de Catafís, de forma que os técnicos do Concello poidan manexar estes datos dunha maneira máis adecuada.
OUTROS ASUNTOS DA XUNTA DE GOBERNO
A Xunta de Goberno celebrada este luns aprobou de maneira provisional a modificación do Peprica, o plan de protección do centro histórico, para materializar o proxecto de ampliación do Museo de Pontevedra a través do subsolo dos seus edificios fundacionais.
O proxecto básico de rehabilitación será presentado en breve e tan só restarían os informes sectoriais da Xunta de Galicia e a posterior aprobación definitiva no pleno municipal.
Por último, o executivo municipal tomou coñecemento do plan antifraude que deberá ser aprobado para recibir os fondos europeos Next Generation, un documento elaborado polos técnicos do Concello e que é un trámite administrativo obrigatorio.