Os veciños da Parda arroupan a Pili polo peche da súa froitaría
Por Diego Espiño
Durante máis de oito anos Pili Moreda Vázquez atendeu cun sorriso a todos os seus clientes desde a froitaría na que traballaba na Parda.
Por iso, o peche do establecemento ocasionou toda unha homenaxe dos veciños deste barrio pontevedrés.
Un nutrido grupo de persoas esperou este mércores á hora de peche do comercio para protagonizar unha homenaxe que colleu de sorpresa á propia Pili.
"Todo aquel co que falas e coñece a noticia do peche sénteo, non polas froitas que hai máis tendas. Sentímolo porque Pili xa non estará no noso día a día", aseguran os veciños sobre unha muller "cariñosa con nenos e maiores" e simpre cun sorriso na cara.
Por todo iso e a pesar da tristeza do peche, que non esperaban, "este é o seu barrio aínda que non viva aquí. Péchase a porta do seu traballo pero quedan a de moitos veciños aberta", afirman os que foron os seus clientes todos estes anos.