A Universidade de Vigo e concretamente o Centro de Investigación Mariña foi pioneiro na adhesión a unha iniciativa australiana chamada CoastSnap xurdida en 2017. Nunha época de proliferación do selfie, aquela comunidade científica expúxose aproveitar imaxes en praias para estudar os cambios que progresivamente rexistran as costas. Actualmente participan máis de corenta países de todos os continentes.
En xullo do pasado 2021 a Universidade de Vigo, a Univesidad de Cádiz, o ICM de Barcelona e o SOCIB de Baleares uníronse para concretar esa iniciativa nas costas españolas a través do proxecto Centinelas de la Costa - e que como CoastSnap ofrece aplicación gratuíta para smartphones -, participado polo FECYT. No caso de Galicia, a Universidade conta coa colaboración daqueles concellos onde hai instaladas bases fixas onde fotografar e que son Bueu, O Grove, Vigo e Muros.
A proposta de colaboración cidadá supón achegar a estas entidades académicas un inxente traballo de campo que realizalo eles a diario "sería inviable, non só por tempo, senón polos recursos económicos que necesitas. Para nós que a cidadanía poida formar parte desa toma de datos e facilítennolos é valiosísimo". Hai instaladas bases fixas en enclaves costeiros determinados e quen queira colaborar fai unha fotografía desde esas bases, ou desde un mesmo punto fixo do litoral. A imaxe envíase á aplicación Centinelas de la Costa.
Que datos extráense?, comprobar se esas liñas costeiras están a erosionarse, recuperando tras un temporal, que perfil, morfoloxía ou capacidade de ocupación ten un areal, como rompen as ondas, se hai ou non verteduras, lixos, arribazones de algas, etc..." e iso pódenos axudar a unha boa xestión", comenta Rita González Villanueva, investigadora do Centro de Investigación Mariña, no programa 'Cara a cara'.
Aínda que poida parecer o contrario, a costa está integrada "por elemenos moi vivos que responden rapidamente a calquera cambio ao seu ao redor: mareas, ondada, tormentas, ventos... calquera cambio vai ter influencia" e tamén "a acción do home coa construción dun porto, dun paseo, unha barreira artificial, ou a destrución de espazos dunares" explica no podcast de PontevedraViva Radio.