Pontevedra, ás portas do récord histórico de altas temperaturas
Por Alejandro Espiño
Os 39,3 graos que se rexistraron este martes en Pontevedra quedaron moi preto do récord histórico da temperatura máis altas xamais rexistrada na cidade.
Quedou a tan só tres décimas dos 39,6 graos que, segundo os rexistros oficiais, alcanzou a Boa Vila hai 19 anos, en agosto de 2003. Tamén nun episodio inusual de altas temperaturas que se alongou durante unha semana.
A hora do día na que Pontevedra achegouse máis a esta marca, como recollen os datos da estación de Meteogalicia en Campolongo, foi ás 11:20 horas.
Esta onda de calor extrema continuará este mércores, xornada na que segundo as previsións meteorolóxicas Pontevedra volverá superar os 37 graos de máxima.
CONSELLOS PARA A CALOR
Debido a estas condicións, Sanidade recomenda beber máis líquido do habitual sen esperar a ter sede, sobre todo auga e zumes de froita lixeiramente fríos. Ademais, suxiren evitar inxerir bebidas quentes, alcohólicas, café, té e as moi azucradas.
Respecto da vestimenta, débese usar roupa de tecidos naturais, lixeira e folgada, de cores claras, chapeus, lentes de sol e cremas solares. O calzado deberá ser cómodo e transpirable.
É conveniente non ir á praia nas horas de máxima calor nin, na medida do posible, facer actividades físicas baixo o sol. No caso de estar na casa, recomendan baixar as persianas e pechar as xanelas, abríndoas pola noite para ventilar.
Nos momentos de calor máis intensa pódese refrescar o corpo cunha ducha ou cun baño en auga morna, así como recorrer a ventiladores ou aire acondicionado.