Unha viaxe no tempo aos anos 50 para dar a merecida homenaxe á cociña das avoas
![](/web/cache/scene/uploads/fotos/foto/6b1/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6292267db4-20220528-saiz-parque-esculturas-avoa-fest-013.jpg)
© Cristina Saiz
![](/web/cache/scene/uploads/fotos/foto/1ab/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6292267ed8-20220528-saiz-parque-esculturas-avoa-fest-017.jpg)
© Cristina Saiz
![](/web/cache/scene/uploads/fotos/foto/a91/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/62922680e2-20220528-saiz-parque-esculturas-avoa-fest-025.jpg)
© Cristina Saiz
![](/web/cache/scene/uploads/fotos/foto/002/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6292268258-20220528-saiz-parque-esculturas-avoa-fest-029.jpg)
© Cristina Saiz
Un Seat 600, o coñecido como Seiscentos, irrompeu pasado o mediodía deste sábado na Illa das Esculturas. Todas as miradas se detiveron no seu exterior, pois estaba totalmente tuneado como se aínda datara 1957 e acabara de saír da fábrica. Dous rótulos chamaban especialmente a atención, Capital Gastro no capó e Avoa Fest no lateral. Acababa de darse por inaugurada a nova romaría que aspira a quedar fixa no calendario festivo de Pontevedra, o Avoa Fest.
O bo tempo deste sábado, con temperaturas superiores aos 30 graos durante practicamente toda a xornada, levou aos pontevedreses a moverse cara ás praias e reduciu a asistencia a esta romaría, que encheu de festa a contorna da Illa do Covo.
No Seiscentos que causou sensación chegaron á zona da festa os concelleiros de Promoción Económica, Desenvolvemento Sostible e Benestsar Social, Yoya Blanco, Iván Puentes e Marcos Rey. Os tres responderon a un dos chamamentos realizados desde a organización para acudir á festa vestidos dos anos 50.
Unha parte dos asistentes responderon a este chamamento, que buscaba completar unha viaxe ao pasado para trasladar Pontevedra a unha romaría das de antes, daquelas ás que acudían as avoas, como protagonistas indiscutibles do Avoa Fest.
O Avoa Fest, impulsado no marco do proxecto Pontevedra Capital Gastro, organizouse cunha vertente gastronómica moi importante e levou ata esta zona verde ao carón do río a restaurantes da cidade especializados en cociña tradicional.
Como en toda boa romaría, as persoas asistentes puideron comer ben. Ameixas á mariñeira de Casa Digna, Carne ao caldeiro de A Fervella, churrasco de A ponte de Marcón, orella de Casa Cochón, embutidos e choripán de El Maño, pan e empanadas de Mipa e polbo á feira de Pulpeiro de O Carballiño completaron o menú.
Alborada, música e animación da época, campionatos de dominó e tute por parellas, un curso para aprender a bailar 'ajarrados', xogos tradicionais e unha verbena con Randeeira, Chisto e Cascarillas para rematar completan a programación de doce horas de festa desta segunda edición dun evento que rende homenaxe ás avoas e a súa comida.
No marco deste Avoa Fest, ademais, o vicerreitor do Campus Universitario de Pontevedra, Jorge Soto, recibiu un agasallo de homenaxe dos concelleiros Yoya Blanco, Iván Puentes e Marcos Rey polo seu labor e implicación no proxecto Pontevedra Capital Gastro.
Soto recibiu un prato de madeira (como o do Premio Loureiro de Ouro) cunha folla de loureiro e a frase 'Grazas Jorge por cociñar con corazón tantas receitas con nós' gravados, que lle entregou a gañadora do Desafío Filloa celebrado o ano pasado, Cuca Gómez Verguttini.
Romaría do II Avoa Fest
O Avoa Fest supuxo este sábado viaxar ao pasado nun evento no que, ademais dunha morea de postos de degustación de cociña tradicional da man de diferentes restaurantes do municipio, houbo alborada, música e animación da época, campionatos de dominó e tute por parellas e mesmo un curso para aprender a bailar 'ajarrados' e verbena
© Cristina Saiz
Relacionadas:
-
Porto convida a cociñeiros pontevedreses á inauguración do reformado Mercado do Bolhão
Por Redacción |
-
Unha romaría dos anos 50 na Illa das Esculturas dará unha volta ao Avoa Fest o sábado 28 de maio
Por Natalia Puga & Diana Eiras |
-
A cidade de Pontevedra xa é oficialmente candidata a Capital Española da Gastronomía 2023
Por Redacción |