Queixas polo "ruido insoportable" das 50 tapas de rexistro da rúa Lameiriña
Por Oskar Viéitez
O concelleiro de Obras de Servizos, o socialista Julio Casás, saiu ao paso das queixas polo "ruido insoportable" das tapas de rexistro na rúa Lameiriña lembrando que a obra de mellora desta contorna, na parroquia de Raxó, atópase actualmente "aínda en execución".
O Partido Popular fíxose eco do malestar veciñal polo ruído que provocan as arquetas neste vial co tránsito de vehículos e reclamando unha solución ao problema.
A concelleira do PP, Rocío Cochón, sinalou que son máis de 50 arquetas, que non están fixas, "nun vial estreito que fai imposible esquivalas para os coches e que ten como resultado un ruido insufrible".
Este xoves, o edil do Goberno local, estivo pasando revista ao estado da zona e sinalou que a empresa responsable da actuación, Covsa, "ten constancia desta situación" e apuntou que "estase a buscar unha solución para solucionar ese problema de aquí a que finalicen os traballos".
Está previsto que a actuación estea finalizada ao 100% este mesmo verán.