O guindastre municipal de Sanxenxo traballará as 24 horas en verán e Semana Santa
Por Redacción
Case 120.000 euros. Ese é o prezo de licitación polo que o Concello de Sanxenxo sacou a concurso o servizo do guindastre municipal. O novo contrato terá unha duración de catro anos.
O guindastre, segundo adianta o goberno municipal, pasará a estar operativo 99 días na tempada estival, entre os días 14 de xuño e 20 de setembro, e outros once días en Semana Santa, desde o venres anterior ata o luns de Pascua. En ambos os dous casos traballarán as 24 horas.
Fóra destes períodos, o guindastre realizará retiradas puntuais de vehículos ata un máximo de 30 actuacións ao ano.
O persoal contratado para conducir o vehículo guindastre estará composto polo número de condutores suficiente para cubrir as quendas diarias.
Ademais, deben posuír, polo menos, e manter durante o período do contrato os permisos de conducir C1+E vixentes, para poder realizar os labores de retirada de vehículos da vía pública.
O Concello introducirá en materia laboral unha cláusula para combater o paro. Así, o adxudicatario do servizo estará obrigado a que no persoal da empresa que participa na execución deste contrato figure un mínimo dun traballador de entre 18 e 35 anos de idade ou ben un traballador de 50 anos ou máis.
O contratista deberá asumir o custo de rotular o vehículo guindastre cos logos do Concello de Sanxenxo para que se poida identificar como servizo municipal.
O persoal que conduza o guindastre contará en todo momento con chalecos reflectores nos que figure a identificación "Servizo de Guindastre Municipal do Concello de Sanxenxo", vestimenta que deberán utilizar en todas as actuacións que realicen.