A Deputación sinala a Vilagarcía como un referente do 'Modelo Ágora'
Por Redacción
Vilagarcía é un referente do 'Modelo Ágora' de recuperación do espazo público para as persoas. Así o manifestaron este mércores o deputado de Mobilidade e Espazos Públicos Uxío Benítez e o de Cooperación Santos Héctor, nunha visita á vila para coñecer a transformación que se está a realizar nas prazas e rúas do concello máis populoso do Salnés grazas aos fondos provinciais, en concreto as obras de recuperación da rúa Arzobispo Lago que serán realidade nos vindeiros meses.
O deputado Uxío animou ao goberno local "a que sigan a ser valentes e ambiciosos, porque non hai cousa máis bonita que devolver os espazos á xente e esa é unha responsabilidade absoluta e única dos concellos".
Destacou que o proxecto para a recuperación da rúa Arzobispo Lago foi presentado á liña de axudas do Plan Ágora e conseguiu moi boa puntuación e a subvención máxima (100.000 euros) polo cumprimento dos Principios Ágora.
Pola súa banda, o deputado de Cooperación Santos Héctor sinalou que a Deputación está a apoiar de forma decidida a transformación que se leva adiante en Vilagarcía. "Os recursos do Plan Concellos, que en Vilagarcía suman estes anos 11 millóns de euros, están a permitir con máis de 60 proxectos toda esta gran transformación", dixo, lembrando obras como a humanización da Rúa Camilo José Cela, a urbanización na rúa Freixo (Vilaxoán), as obras de humanización e accesibilidade no Piñeiriño; a mellora da accesibilidade no acceso aos colexios A Lomba e Arealonga e na rúa dos Duráns, ou a urbanización contorna rúa García Caamaño, entre outras.
Subliñou Héctor que este ano o Plan Concellos inclúe tamén a liña 1 (de obras) do ano 2023 polo que Vilagarcía recibe 2.392.420 euros. "O Concello xa ten solicitadas 7 novas obras para este ano entre elas tres que tamén serán exemplo de transformación: a humanización rúa Aquilino Iglesia Vilariño; a construción do skatepark, ou a mellora da accesibilidade en Doutor Tourón, Marxión e urbanización O Piñeiriño", dixo.
No balance de actuacións tamén lembrou que no Plan DEPOREMSE realizouse unha obra por valor de 435.802 euros para mellorar a seguridade viaria na contorna de FEXDEGA, ou a mellora da Vía Verde do Salnés, primeira ruta nunha antiga vía de ferrocarril que transcorre integramente por Galicia: Vilagarcía, Caldas de Reis e Portas.
Relacionadas:
-
A rede Ágora da Deputación: a revolución do espazo público para as persoas na provincia
Por Noticia patrocinada |
-
Comezan en Vilagarcía os traballos de mantemento da Vía Verde do Salnés
Por Redacción |
-
Premios #FotoÁgora, unha filosofía sobre o espazo público resumida en imaxes
Por Noticia patrocinada |
-
Premio ás 32 imaxes que mellor amosan que as persoas son as destinatarias do espazo público
Por Redacción |
-
A construción do vial perimetral do Gran Montecelo comezará en maio
Por Alejandro Espiño |