O instituto caldense do Aquis Celenis participa nun programa da Axencia Espacial Europea
Por Redacción
Arredor de 70 estudantes de oito centros educativos de Galicia, entre eles o IES Aquis Celenis de Caldas de Reis, déronse cita durante a xornada deste xoves nas instalacións do centro de investigación aeroportada de Rozas, para participar na fase galega do certame de proxectos espaciais CanSat.
Trátase dunha competición promovida pola Axencia Espacial Europea na que os alumnos realizan unha simulación dun satélite desde a súa concepción ata o lanzamento ao espazo e posterior recollida de datos.
A Xunta de Galicia apoia por terceiro ano consecutivo a organización da fase galega desta xornada da cal sairán os representantes que acudirán á competición a nivel estatal.
Desde primeira hora da mañá os participantes prepararon a súas correspondentes actuacións que incluiron a instalación do espazo de traballo, a preparación do CanSat e os lanzamentos e a presentación dos resultados obtidos dese lanzamento a partir dos cales o xurado emitirá o seu veredicto.
Un CanSat é unha simulación satélite integrada dentro dunha lata de refrescos. O desafío para o alumnado consiste en introducir nun espazo reducido os principais elementos dun satélite real, como a alimentación eléctrica, os sensores e o sistema de comunicacións. A continuación lánzase o CanSat a unha altura aproximada dun quilómetro e déixase caer desde unha plataforma mediante un dron, un globo cautivo, un cohete ou calquera outro método.
O experimento científico consiste en lograr unha aterrizaxe sen danos e a análise dos datos durante o descenso.
No marco desta actividade, o IES Aquis Celenis logrou dous premios, á misión científica máis destacada e ao mellor equipo e competencias profesionais.