A nova Praza Pintor Souto amplía os espazos de convivencia no ámbito de Loureiro Crespo
As obras de remodelación da Praza Pintor Souto, un espazo interior da rúa Loureiro Crespo, están practicamente rematadas. Esta área urbana pasará a ser un ámbito de convivencia veciñal.
A esta intervención, que vai en consonancia estética coa reforma do vial principal, só lle resta a instalación dunha zona de caucho cun xogo infantil no chan e a instalación do mobiliario.
Na praza, segundo destacou o alcalde Miguel Anxo Fernández Lores, primouse a accesibilidade e a plataforma única en todo o espazo, que pasa a ser de convivencia entre peóns e vehículos.
Ademais, plantáronse varios loureiros, dando continuidade ao paseo 'verde' coas árbores que hai nas beirarrúas entre a Peregrina e a Avenida de Lugo.
Para rematar o proxecto global de renovación do barrio, afirmou Fernández Lores, tan só resta a pavimentación das rúas Ernesto Caballero e Ramón Cabanillas, no Castañal, onde xa están soterrados todos os servizos e solventados os problemas coas augas pluviais.
A empresa, engadiu o rexedor, está facendo un esforzo "moi grande" xa que existen problemas de subministración que complicaron a obra, pero agarda que estea rematada "nun prazo prudente".
"Este era un barrio que tiña falta de investimento e de creación de espazo público de calidade", sentenciou o alcalde, que amosou a súa satisfacción coa actuación e o seu resultado.