Tras completar a reforma integral de Loureiro Crespo, o Concello actuará noutro ámbito urbano dese barrio. Trátase da Praza do Pintor Arturo Souto, que mudará completamente de aspecto cuns traballos destinados a reforzar a accesibilidade desta zona.

O proxecto, segundo destaca o goberno municipal, foi consensuado cos veciños e comerciantes, cos que se reuniron esta semana para explicarlles os detalles das obras que, se non hai imprevistos, comezarán este mesmo luns.

A actuación permitirá eliminar todas as barreiras arquitectónicas da praza e habilitar unha plataforma única, recuperando o espazo para o uso libre das persoas.

Así, desaparecerá o carril de vehículos que bordeaba a praza. Unha vez rematada a obra, os vehículos poderán seguir accedendo ata o final deste espazo, pero deberán facelo limitando a velocidade, convivindo cos peóns e sen preferencia, ao non contaren cun paso de seu. 

Ademais, as laranxeiras da zona serán transplantadas a outro lugar da cidade, pois serán renovadas por outro tipo de arboredo.

Nese sentido, o edil de Obras, Demetrio Gómez, sinalou que non hai unha preferencia, pero que serán as que os técnicos poidan plantar no momento de remate da obra e dependerá da tempada e dos exemplares que haxa no viveiro.

Ante a actual situación sanitaria, sumada aos problemas de subministracións, o Concello non avanza unha data final para estes traballos, pero agarda que sexa o antes posible.