Festa no Gorgullón para celebrar o fin das obras nas rúas perimetrais do barrio
Por Oskar Viéitez
O Concello de Pontevedra organiza unha festa para celebrar a finalización das obras nas rúas perimetrais do Gorgullón.
O concelleiro de Obras urbanas, Demetrio Gómez, anunciou que o vindeiro venres 1 de abril ás seis da tarde comezará unha serie de actividades para "poñer o ramo" a esta reforma que xa está rematada.
Demetrio Gómez sinalou que a festa servirá para celebrar "tres cousas", por unha banda que "a vida vai voltando á normalidade despois de dous anos".
En segundo lugar, o Concello quere "agradecer á veciñanza" a súa colaboración e paciencia durante todo este tempo, e finalmente o resultado desta reforma que deixou un "barrio de altísima calidade".
Ás 18 horas deste venres 1 de abril comezará a festa infantil na Praza da Curtidoira e o pasarrúas. Ás 18.30 horas na rúa Sarmiento de Gamboa, preto da residencia Soremay, o Grupo Foula fará un espectáculo musical con boleros e swing para "animar ao baile".
Demetrio Gómez convidou a toda a cidadanía a participar nesta festa ou a pasearse polas rúas, especialmente "á noitiña" para comprobar a nova iluminación dunha zona da cidade que "quedou bonita".
Relacionadas:
-
Denuncian o "abandono" de Pedro Sarmiento de Gamboa desde o fin das obras da contorna do Gorgullón
Por Redacción |
-
O Gorgullón vístese de gala para celebrar o final das obras
Por Redacción & Mónica Patxot |
-
O Concello adoptará "decisións" para reducir "racionalmente" o tráfico en Eduardo Pondal
Por Alejandro Espiño & Mónica Patxot |