O goberno galego insiste. "Non temos alternativa", asegura o vicepresidente Alfonso Rueda, para a localización da fábrica que Ence ten en Pontevedra. Así llo trasladarán aos representantes do comité de empresa cos que se reunirán o vindeiro xoves.

Será un encontro co titular de Industria e vicepresidente segundo, Francisco Conde, que segundo Rueda reiterará aos traballadores que o lugar "no que tiña que estar" a fábrica de pasta de papel "é no que está actualmente".

"É a localización que permitía a súa consolidación e o seu crecemento", sinalou o dirixente autonómico nun almorzo informativo celebrado en Pontevedra. 

A Xunta, apuntou Alfonso Rueda, "se pode ser parte da solución o será", pero engadiu que as alternativas á fábrica de Ence "non poden partir dunha administración que dixo que a solución a tiñamos diante das narices e empeñámonos en rebentala".

"Os que queren que non siga a fábrica terán que ter unha solución se a fábrica non está. A Xunta non a ten", subliñou Rueda, que instou ao Concello de Pontevedra e ao Goberno central a non "poñerse de lado" despois de "provocar este terremoto".

Para a reunión da mesa de traballo sobre Ence, que o Ministerio para a Transición Ecolóxica convocou para o próximo 10 de setembro, o vicepresidente galego espera que estas dúas administracións "nos digan a todos cal é o plantexamento".

Ambas, insistiu Rueda, "de repente decidiron que aquí non podía seguir e que había que facer o posible para que marchara" e lamentou que, a falta dos recursos xudiciais que se expoñan á sentenza da Audiencia Nacional, "parece ser que o conseguiron".

"A Xunta non fixo nada. Son vostedes os que botaron a fábrica", díxolles, instándolles a que digan "cal é a solución para que o traballo de Ence quede na comarca de Pontevedra".

CRÍTICAS DO PARTIDO SOCIALISTA

A viceportavoz do grupo parlamentario do Partido Socialista, Paloma Castro, censurou as declaracións "absolutamente irresponsables" do vicepresidente da Xunta, Alfonso Rueda, respecto do futuro de Ence e considera "inadmisible que Feijóo e Rueda se poñan de perfil diante duns traballadores que reclaman a súa axuda para manter os seus postos de traballo".

A responsable socialista acusa ao vicepresidente da Xunta de "pretender que o Estado prevarique permitindo que a empresa vulnere a Lei de Costas que eles mesmos modificaron, e logo de que fora a Xustiza a que desbotara a prórroga concedida de forma irregular polo goberno do PP presidido por Mariano Rajoy".

Por último, a voceira socialista lamenta que "a desidia coa que a Xunta afronta a política industrial de Galicia durante estes anos fíxolle esquecer que o goberno autonómico é o que ten competencia na materia", e reclamou que "se poñan a traballar, que para iso presiden o goberno de Galicia, e non para abandonar á súa sorte aos traballadores e traballadoras de Ence".