O alumnado dos colexios Sagrado Corazón, Ponte Sampaio e Marcón, protagonistas da terceira xornada de Pontenciencia
Por Redacción
Este mércores desenvolveuse a terceira xornada do programa Pontenciencia 2021, na que recibiron a visita do xurado o alumnado de Primaria e Secundaria do CPR Sagrado Corazón de Pontevedra e o alumnado de 6º de Primaria dos CEIP Ponte Sampaio e Marcón.
Leváronse a cabo as seguintes actividades:
'Morcegos, un sexto sentido', unha presentación en power point sobre a bioloxía, ecoloxía e conservación dos morcegos (centrada nas especies presentes en Galicia) e unha acticvidade práctica sobre métodos de estudo de morcegos (en especial a tecnoloxía de detección ultrasónica. Para os rapaces de 3º e 4º da ESO do CPR Sagrado Corazón.
'O bosque viaxeiro: as árbores son esenciais para a vida', un obradoiro no que se explica como se poden propagar in vitro dun xeito divertido e que está realizado polos investigadores do Instituto de Investigacións Agrobiolóxicas de Galicia-CSIC. Para alumnos de 4º da ESO do CPR Sagrado Corazón.
'A mitoloxía galega: un mundo por descubrir', unha actividade didáctica arredor do patrimonio inmaterial galego no que se aborda dun xeito ameno e accesible o mundo da mitoloxía galega e lles dá a coñecer aos rapaces o mundo das lendas, os seres míticos e as crenzas vencelladas á nosa literatura oral. Para 3º da ESO do CPR Sagrado Corazón.
'Reaccións químicas', obradoiro dirixido ao alumnado de Primaria no que experimentarán diferentes reaccións químicas interesantes. Para estudantes de 6º curso do CPR Sagrado Corazón.
'Teatro: Náufrago'. Interpretación dunha obra na que se visibilizan fenómenos e coñecementos científicos a través dun guión ameno e entretido. Para todo o alumnado do CPR Sagrado Corazón.
'Laboratorio musical', laboratorio sonoro de creación de música. Para os rapaces de 6º Primaria do CEIP Ponte Sampaio.
'O número áureo: a divina proporción', un obradoiro participativo para coñecer o número de ouro, tamén coñecido como proporción áurea ou divina proporción, un dos conceptos matemáticos que aparecen unha e outra vez ligados á natureza e á arte. Nel explórase a continua presenza das matemáticas na nosa contorna e vida cotiá, contextualizando a aprendizaxe dunha materia que ás veces resulta allea a nenos e nenas. Para os alumnos de 6º de Primaria dos CEIP Ponte Sampaio e Marcón.
Relacionadas:
-
1.500 mochilas e bolsas de tea para agradecer o emprendemento científico entre estudantes
Por Redacción |
-
A oitava edición de Pontenciencia xa busca os seus gañadores
Por Redacción |
-
As investigacións sobre presenza de microorganismos no aire, maioritarias en Pontenciencia 2021
Por Redacción |
-
Pontenciencia abre esta semana os obradoiros de formación en método científico
Por Redacción |