37 residentes, homenaxeados ao finalizar a súa formación na área sanitaria
Por Redacción
37 especialistas sanitarios finalizaban este luns o seu período de formación nos hospitais e centros de saúde da área de Pontevedra e O Salnés. O xerente José Ramón Gómez Fernández e os presidentes da Comisión de Docencia, os doutores Ismael Arán González e Álvaro Rodríguez Pomares, facían entrega no acto de despedida que se desenvolveu en Montecelo dos certificados que acreditan a súa formación no Complexo Hospitalario Universitario de Pontevedra (CHUP).
Entre este grupo figuran trece médicos de familia, dúas matronas, dezaoito especialistas hospitalarios e catro enfermeiras de familia. Gómez Fernández convidou durante a súa intervención no acto a que estes novos profesionais aproveiten ao máximo os retos que se presentan no actual sistema sanitario.
O xerente destacou o labor destes residentes durante este período marcado pola presenza da covid-19 e encomiou o traballo de equipo que se desenvolve na área sanitaria. Actualmente, nesta zona atópanse 64 titores, dos que 24 imparten docencia en Atención Primaria, 29 forman en Atención Hospitalaria e 11 encárganse da rama de Enfermería.
Ademais, a partir de agora, a área sanitaria contará tamén con cinco prazas de profesorado asociado de Ciencias da Saúde da Universidade de Santiago de Compostela nas especialidades de Aparello Dixestivo, Cirurxía Xeral e Dixestiva, Dermatoloxía, Medicina Interna e Psiquiatría. Esta convocatoria sairá publicada no Diario Oficial de Galicia deste martes 25.